Lea goalmmát jahki go Sámediggi bovde olbmuid Sámi giellavahkkui golggotmánu 25.-31. beivviid. Sámi kirkoráđđi ávžžuha buot searvegottiid Norgga kirkus leat mielde dán čalmmustahttimis. – Sápmelaččat ásset miehtá Norgga, lohká Sámi kirkoráđi jođiheaddji Sara Ellen Anna Eira.
– Sámi giellavahkku lea buorre liiba loktet sámi gielaid ja kultuvrra kirkus, lohká Sámi kirkoráđi jođiheaddji Sara Ellen Anna Eira preassadieđáhusas.
Son muitala leat máŋga vuogi mo sáhtášii čalmmustahttit sámegiela Ipmilbálvalusas.
– Sáhttá ovdamearkka dihtii lohkat sisabeassan sániid sámegillii, lávlut sálmma sámegillii dahje lohkat Áhččemin rohkosa sámegillii. Sámi kirkoráđi neahttasiiddus gávdná veahki: Sámi kirkoráđi neahttasiidu. Liturgiijateavsttat leat jorgaluvvon davvi-, julev- ja máttasámegillii. Dasa lassin gávdno olles biibbal davvisámegillii, lohká Sámi kirkoráđi jođiheaddji Sara Ellen Anna Eira.
Ipmilbálvalus sámegillii
Sotnabeaivvi, golggotmánu 24. beaivvi, lea Romssa duopmokirkus Ipmilbálvalus sámegillii, ja dat sáddejuvvo neahta bokte. Dan njuolggosáddaga sáhttet olbmot miehtá riikka čuovvut. Beaivvi maŋŋá álggahuvvo sámi giellavahkku.
– Ipmilbálvalus lea unnimus golmma sámegillii. Lea buorre álgu Sámi giellavahkkus, lohká Sámi kirkoráđi jođiheaddji Eira ja sávvá ge buohkaide buori ja ávkkálaš sámi giellavahkku!
