Beaska Niillas lei váldán veahá bottu politihkas, muhto dál lea gearggus fas go lea searvan NSR nuortaguovllu njunuševttohussan.
Nuortaguovllu NSR evttohusat leat dál almmuhuvvon, ja njunnošis lea Beaska Niillas. Son lea giellabargi ja duojár Deanus. Sus lea oanehis boddu leamašan, muhto dál lea gearggus fas lávket Sámediggái jus beassá.
Son čállá ná kommentáran:
«Dál lean fas gearggus bargat sámi servodaga ovddas, go áššit eai váillo ja sisabahkkejeaddjit leat valvin jođus. Mun lean sihke váillahan ja leamaš ilus go in lean fásta áirras mannan áigodaga. Sámepolitihkka lea gelddolaš ja seammás hástaleaddji, de lei buorre veaháš bosihit, dadjá Beaska.
Beaska Niillasa váibmoáššit leat sámegiella ja eanansuodjaleapmi.
NSR nuortaguovllu válgalisttu 2021 sámediggeválggaide:
1. Beaska Niillas, Deatnu
2. Jovnna Vars Smuk, Unjárga
3. Arnhild Olsen Pak, Mátta-Várjjat
4. Tone Persen, Čáhcesuolu
5. Márjá-Liisá Partapuoli
6. Leif Pedersen, Gilevuotna
7. Ellinor Skartland, Deatnu
8. Per Anders Store, Mátta-Várjjat
9. Iris Egilsdatter Somby, Deatnu ja Unjárga
10. Terje Lilleeng, Čáhcesuolu
