– Go nu oallugat rihkkot njuolggadusaid, de ráhkada dat issoras dilálašvuođaid johtolagas juohke beaivvi. 24 heakka livččiimet seastán diibmá.
Dan dadjá Frende Forsikring mohtorossodaga fágahoavda, Roger Ytre-Hauge. Iskkadeapmi, man Norstat lea dahkan buhtadusfitnodaga ovddas, čájeha ahte 83 proseantta rihkkot johtolatnjuolggadusaid vuojedettiin biillain.
– Oallugiin váldet menddo geahppasit leahttorájáid ja johtolatnjuolggadusaid muđui, dadjá fágahoavda.
Menddo alla leahttu sáhttá dagahit stuorra bártti
Stáhta geaidnodoaimmahaga dieđuid mielde lea leahttu leamaš menddo allat 7/10 leahttuolihkohisvuođain. Geaidnodoaimmahat maid dieđiha ahte jus buohkat livčče doalahan leahttorájá 2019:s, de livčče 24 heakka seston ja 85 olbmo eai lean nu garrasit roasmmehuvvat.
– Gaska lea hui unni ja logi kilomehtera badjel rájá dagaha stuorra erohusa jus beaškkeha oktii nuppiin, dadjá Ytre-Hauge.
Biila lea vearju
– Orru leame nu ahte mii láhttet eará ládje johtolatnjuolggadusain go eará lágain servvodagas. Jáhkkit ahte son ii bija earáid ja iežas várálašvuhtii go rihkku njuolggadusaid, mii lea áibbas boastut, dadjá Trygg Trafikk seniorráđđeaddi, Bård Morten Johansen.
Son bivdá olbmuid muitit ahte biila leahtus lea vejolaš várálaš vearju.
Dárkkis dálkedieđuid ja siivvu
– Mii vávjit ahte oallugat eai vuhtii váldde iešguđet dilálašvuođaid leahtu dáfus. Jus lea gállja, seavdnjat dahje heajos oainnádat, de ferte olmmoš vuhtii váldit dan maid. Jus ii leat dorvvolaš vuodjit leahtorájá mielde, de ferte geahpedit leahtu, dadjá Ytre-Hauge.
Trygg Trafikk lea ovttaoaivilis.
– Ferte álo árvvoštallat leahtu iešguđet diliid dihte. Vuodjit 30 km/diimmus busse meattá vuordinsajis orru heivvolaš leahttu, muhto jus mánná viehkala rastá luotta busse ovddabeale, de lea dus menddo leahttu, dadjá Johansen.
Nuoramus ja boarrásamos leat čeahpimusat
Buhtadusfitnodaga iskkadeapmi čájeha ahte olbot gaskal 30- ja 60-jahkásaččat rihkkot njuolggadusaid seamma olu. Dan stuorra ahkejoavkkus dadjet measta 9/10 ahte sii rihkkot njuolggadusaid vuojedettiin.
Dilálašvuođat leat olu buoret nuoramus (18–29-jahkásaččat) ja boarrásamos (60+) vuddjiin, muhto dán joavkkus maid rihkkot gávccis logi olbmos njuolggadusaid.
Dan čállá Frende Forsikring preassadieđáhusas.
