Gárrenávnnassorjavaččat vásihit stigmatiserema ja vealaheami go lea oktavuohta dearvvašvuođadoaimmahagain, čájeha Norgga olmmošvuoigatvuođaid ásahusa raporta.
Ásahus, mii oaniduvvo NIM:n, lea jearahallan 17 dálá ja ovddeš gárrenávnnassorjavačča sin deaivvademiid birra almmolaš bálvalusaiguin, čállá Altinget.
Raporttas boahtá ovdan ahte gárrenávnnassorjavaččat deaivvademiin dearvvašvuođadoaimmahagain ja eará almmolaš bálvalusaiguin vásihit ovdagáttuid, hilguma, pasieantajournála mii čájeha ahte sii leat «gárrenávnnassorjavaččat», ja ahte sii dan geažil eai oaččo dálkasiid.
– Olu maid informánttat muitalit, čájeha ahte lea duohta várra ahte gárrenávnnassorjavaččat vásihit vealaheami almmolaš bálvalusain, dadjá NIM-direktevra Adele Matheson Mestad neahttamediai.
NIM:s leat guokte rávvaga eiseválddiide: Čielggadit movt dán pasieantajoavkku vealahansuodjalusa sáhttá dahkat čielgaseabbon lágain, ja álggahit doaibmabijuid buoridan dihte dihtomielalašvuođa gárrenávnnassorjjasvuođa birra.
Dearvvašvuođa- ja fuolahusdepartemeantta stáhtačálli Ellen Rønning-Arnesen lohká ahte raporta lea informatiiva, ja ahte son váldá dan mielde ođđa gárrenmirkoreforpma bargui.
(©NTB)
