-Almmuhus-
-Almmuhus-
VALÁŠTALLANGarra gilvu junioraid gaskkas

Garra gilvu junioraid gaskkas

-

-

Junior-luohkás leat viđas gilvaleamen njunnošis.

Vihtta falimus vuoddji Finnmarksløpet juniorluohkás, ollejedje buohkat Joatkka duottarstohpui birrasiid beal gávccis otná iđida.

 – Gilvvut leat mannan bures dán rádjai, eai leat leamaš makkárge erenoamáš hástalusat, muitala Finnmarksløpet preassaguovddáža jođiheaddji Nils Westphal.

 

Son muitala ahte FL-500 šadde vuodjit biekka čađa Jergulii, muhto dat manai bures go ii lean guoldu iige buolaš. Muđuid muitala FL-1000 vuddjiid ges vásihan ahte leat veaháš dipma láhttut.

 

Maŋŋemaŋŋálaga

Ovddimusas lei Anette Børve Hernes guhte joavddai dii. 07.20, dakka maŋŋil jovde Hanna Lyrek, Guro Krempig, Mina Skjøthaug Karlstrøm ja Elisabeth Uglebakken.

Dál lea sis bákkolaš bisáneapmi Joatkkas, ja šaddet doppe orrut golbma diimmu dan rájes go ollejedje. Dat mearkkaša ahte Børve Hernes ii beasa vuoddját viidásat Áltái ovdal áramusat diibmu 10.20.

Diet viđas leat nu lahkalaga ahte vuos lea váttis einnostit guhte vuoitá, junioraid jáhkket ollet mollii Áltái guovtti áigge beaivet otne.

 

Eará luohkáid bohtosat

FL-500 luohká njunuš lea maid jo vuodján Kárášjoga meaddil. Dán luohkás lea Seiertun Bjerke ovddimusas láhttus, 

 – Liikká ii leat son vuoittu bealde gilvvus go rehkenastá vuodjin- ja vuoiŋŋastanáiggiid. Elisabeth Edland dat lea ovddimusas gilvvus dál, čilge preassaguovddáža jođiheaddji muhto lohká vuos ain árrat einnostit guhte vuoitá.

 – Go de jorgalit Leavvajogas fas, de oaidnigoahtá buorebut guhte dat lea falimus, čilge Westphal.

 

Edlandas lea gilvonummar 38, muhto su GPS čuovvunrusttet ii doaimma, danne son ii oidno Finnmarksløpet kárttas.

 

FL-5OO RNB luohkás lea Eveline Koch ovddimusas, son ollii Kárášjohkii diibmu 06.35 ja FL-1000 luohkás ges lea May-Conny Johansen ovddimusas, son ollii Leavvajohkii diibmu 07.27, ii goabbáge dán guovttis lean vuoddján viidáseappot diibmu 9.40 sotnabeaivvi iđida.

 

-Almmuhus-