Vaikko ođđa politiijaguovlu lea ge viiddis, de lohpidii ođđa politiijameašttir politiijaid ain leat olbmuid lahkosis.
Vaikko ođđa politiijaguovlu lea ge viiddis, de lohpidii ođđa politiijameašttir politiijaid ain leat olbmuid lahkosis.
Finnmárkku politiijameašttir Ellen Katrine Hætta álggii virgái ođđajagimánu 1.beaivvi, go Oarje- ja Nuorta-Finnmárku šattaiga oktan politiijaguovlun. Preassačoahkkimis Álttás bearjadaga muitalii viidásit bargguid birra dán oktavuođas.
– Mii galgat ain leat lagasguovlluin, doppe gos olbmot leat. Reforbma gohčoduvvo lagaspolitiijan ja mihttu lea buktit oadjebasvuođa álbmogii. Dat lea mu mielas dehálaš deattuhit dán álgodásis mas mii leat dál, dadjá Hætta.
Guokte guovddáža vel jagi
Politiijareforbma galgá bistit vel njeallje jagi, gitta 2020 rádjai, ja olu galgá ain mearriduvvot. Dál leat álgodásis ja leat aitto ovttastahtten 27 politiijaguovllu 12 guovlun. Eai leat vel mearridan galli báikkis politiija galgá leat, muhto politiijat árvvoštallet ahte 210 báikki mii bođii ovdan Politianalyse árvalusas, gal leat beare unnán. Unjárgga leansmánnikantuvra, mii lea kvártta eret Deanu šaldi leansmánnikantuvrras, lea áidna mii lea evttohuvvon heaittihuvvot Finnmárkkus
Finnmárkkus galget easkka 1.kvartálas jagi 2017 ovttastahttit Hámmárfeasttas ja Girkonjárgga operašunguovddážiid.
Ii buot gal sirdo
Dál leat maid olles Finnmárkkus oktiibuot guhtta regiovnna, muhto dat sáhttá rievdat. Politiijameašttir Hætta muitala ahte vaikko operašunguovddáš sirdo Girkonjárgii, ii mearkkaš dat ahte buot mii lea Hámmárfeasttas sirdo dohko.
– Munnje lea dehálaš deattuhit ahte buot ii sirdo Girkonjárgii, muhto galgá šaddat eambbo ovttasbargu dan guovtti báikki gaskka, dadjá Hætta.
Ii guhkkelis go 45 minuvtta
Hætta maid ovdanbuvtti kvalitehtagáibádusaid maid sii fertejit čuovvut ođđa guovllu hábmemis.
– Unnimusat 90 proseanta ássiin ii galgga eambbo go 45 minuvtta biilamátki lagamus leansmánnikantuvrii dahje politijaguovddážii. 95 proseanta riŋgemiin 112 heahtetelefuvdnii, galget vástiduvvot 20 sekundda siste, ja buot suohkaniin galgá maid leat olmmoš gii doallá oktavuođa politiijaiguin, dadjá politiijameašttir.
Hætta háliida fuomášuhttit suohkaniidda ahte sis maid lea ovddasvástádus unnidit kriminalitehta, go dan eai leat suohkana nu bures diehtán dán rádjai. Son muitala viidáseappot ahte dutkan galgá buoriduvvot ja dasa biddjojit eambbo resurssat. Dán rádjái leat bidjan olu návccaid gearggusvuhtii maŋŋel suoidnemánu 22.-ášši, ja dál lea áigi dutkama nannet.
Goziha sámegiela
Sápmelaččaid ja sámegielagiid dárbbuid lea su mielas dehálaš ain atnit muittus.
– In dieđe vuos movt čuohcá sámegielagiidda dát, muhto go ieš lean sámegielat, de geahččalan gozihit ahte sámegielagat oažžon don bálvalusa maid berrejit oažžut, dadjá Hætta.
