Odne, skábmamánu 29. beaivvi, Suoma Sámediggi čoahkkinastá Anáris gos digaštallet láhkaevttohusa.
Dat lea váldoášši áššelisttus čoahkkimis mii bistá ovcci rájes iđđedis 17.00 rádjái.
Suopma lea ožžon moaitagiid ON olmmošvuoigatvuođasoahpamušaid bearráigeahččanorgánain sámiid siviila- ja politihkalaš vuoigatvuođaid loavkideamis jagis 2019 ja ávžžuhuvvui njulget boasttuvuođaid.
Sámediggeláhka lei maiddái sivvan miellačájehemiide Suoma oaivegávpogis, skábmamánu 17. beaivvi dán jagi. Dán beaivvi Suoma ráđđehus doalvvui sámediggelága Riikabeaivái.
– Sámediggelága ođastusas lea jearaldat olmmošvuoigatvuođain. Evttohusain lea vejolaš divvut dálá dili, mii loavkida duođalaš vugiin sámiid eamiálbmotvuoigatvuođaid. Timonen doaibmagotti evttohus sámediggeláhkan lea dássedettolaš, ja das lea lihkostuvvan vuhtii váldit fuolaid, mat badjánit Sámi ja Suoma servodagas, lohká Sámedikki ságajođiheaddji Tuomas Aslak Juuso preassadieđus.
Čoahkkima lea vejolaš čuovvut neahta bokte das.
