Mannan vahkkoloahpa vuittii sámi sogalaš Johann André Forfang silbba Olympiagilvvuin. Dáinna čevllohallet su eadni ruovttusuohkanis.
Mannan vahkkoloahpa lei historjjálaš dáhpáhus.
Njuikejeaddji Johann André Forfang vuittii silbba Olympiagilvvuin mat lágiduvvojit Pyeongchangas Mátta-Koreas.
Son lea vuosttaš tromsalaš guhte lea olahan medálja Olympiagilvvuin.
Lihkkusávaldagat
Maiddái Gáivuonas čevllohallet maŋŋel go sámi sogalaš vuittii silbba.
Johann André Forfang eadni lea oainnat gáivuotnalaš.
– Gáivuona suohkana ja álbmoga bealis sávan hui olu lihku Johann André Forfangii Olympiagilvvuid silbamedáljain. Dá lei máilmmi stuora dáhpáhus, ja mii čevllohallat sakka go sus han lea eadni gáivuotnalaš ja áhčči fas ivgulaš. Mii illudit ain su čuovvut, čálii Gáivuona sátnejođiheaddji Svein O. Leiros suohkana neahttasiidduide maŋŋel njuikema.
