Guovtti jagi geahčen jávket golbma girditoartna Finnmárkkus ja girdijohtolat gáiddus stivrejuvvo. Finnmárkku fylkkasátnejođiheaddji váruha fylkka šaddamis geahččalanguovlun.
Jagi 2017:s galgá girdijohtolat doaibmat gáiddusstivremin Donjevuonas, Bearalvákkis ja Ákŋoluovttas, čállá Finnmárkku fylkkagielda. Nu bođii ovdán Avinor girdišilljostruktuvrra ja girditoartnaid gáiddusstivrema čoahkkimis ikte.
Váruha sihkkarvuođa
Dán čoahkkimii lei maiddái Finnmárkku fylkkasátnejođiheaddji Runar Sjåstad ja konstituerejuvvon johtolathoavda Eirik Selmer bovdejuvvon. Fylkkasátnejođiheaddjái lea sihkkarvuohta deháleamos.
– Ođđa vuogádat ii sáhte ásahuvvot ovdal sihkkarvuohta lea sajis. Finnmárku ii galgga šaddan geahččalanguovlun ovdal sihkkarvuohta lea doarvái buorre, váruha Sjåstad.
Lasihit gáiddusstivrema jahkásaččat
Čoahkkimis dieđihuvvui maiddái ahte Avinor lasiha juohke jagi gáiddusstivrema girdišiljuin, oktiibuot sáhttet 3-5 girditoardna jávkat Norgga girdišiljuin.
– Finnmárkkus eai dáhto rievdadit stivrema Álttá, Leavnnja ja Girkonjárgga girdišiljuin, dadjá Sjåstad.
Bovde čoahkkimii
Finnmárkku fylkkasátnejođiheaddji Runar Sjåstad áigu bovdet Finnmárkku gielddaid ja Avinor oktasaš čoahkkimii. Sutnje lea dehálaš gulahallat dilálašvuođa birra.
– Munnje lea mátkkálaččaid sihkkarvuohta dehálaš. Munnje leat maiddái bargit ja smávva báikkit, maidda rievdadeamit čuhcet, dehálačča, čilge Sjåstad.
