Suoma Sámi Nuorat bivdet Suoma Sámedikki jođáneamos lági mielde joatkit Duohtavuođa- ja soabadankommišuvnna bargguid. Suoma Sámedikki dievasčoahkkin galgá fas gieđahallat ášši čuovvovaš čoahkkimis mii lea čakčamánu 30. beaivvi.
– Mii gáibidit Sámedikki jođáneamos lági mielde válljet ođđa komissáraid, vai proseassa beassá joatkašuvvat. Mii gáibidit min iežamet servvodaga oaidnit, ahte mis lea maiddái váldi ieža meroštallat, maid mii dan proseassas háliidit, boahtá ovdan Suoma Sámi Nuorat searvvi cealkámušas, maid leat almmuhan iežaset neahttasiidui ikte, čakčamánu 12. beaivvi.
Árabut dán mánus Suoma Sámedikki stivra mearridii máhccat fas duohtavuođa- ja soabadankommišuvnna áššái. Mearrádusas leat cealkán ahte vurdet sámi servviin ja olbmuin oaiviliid áššis.
– Kommišuvnna joatkka lea čielgasit gitta das, man bures kommišuvdna lihkostuvvá hukset luohttámuša proseassa ja min álbmoga gaskii, ákkastallet Suoma Sámi Nuorat searvvis dárbbu joatkit duohtavuođa- ja soabadankommišuvnna bargguid.
Buohkaid ášši
Suoma Sámi Nuorat oidnet duohtavuođa– ja soabadankommišuvnna bargguid hui dehálažžan. Searvvi mielas dat lea vuohki viiddidit vejolašvuođaid, gieđahallat min álbmoga rašes vásáhusaid.
– Mii maiddái muittuhit min álbmoga das, ahte nuorra buolva maid guoddá traumaid visot dain áššiin, mat midjiide ja min máttuide leat čuohcan. Mii eat háliit sirdit dien noađi šat viidáseappot ja dasa mii dárbbašit dán proseassa.
Ii vel dahkkon mearrádus
Mannan vahkus Suoma Sámedikki ságadoalli, Tuomas Aslak Juuso lei dadjan čuovvovaččat duohtavuođa- ja soabadankommišuvnna bargguid olis.
– Geavatlaččat mii galgat juogo válljet komissáraid dahje heaittihit kommišuvnna barggu, dajai son Yle Sápmái.
Suoma Sámediggi vuordá sámeservviin ja olbmuin čálalaččat oaiviliid áššis ovdal čakčamánu 19. beaivvi dán jagi. Dasto čuovvovaš dievasčoahkkimis, čakčamánu 30. beaivvi gieđahallá Suoma Sámediggi duohtavuođa- ja soabadankommišuvdnaášši.
