Luonddugáhttensearvvi jođiheaddji Truls Gulowsen oaivvilda ahte bieggafápmu, ruvkket, luottat ja elfápmolinnját leat áittan Sápmái, erenomážit huksenbarggut mat leat jo álggahuvvon.
– Mii gáibidit ahte stáhta bisseha huksemiid mat čuhcet lundui ja boazodollui sámi guovlluin. Árvvusatnit álgoálbmogiid guovlluid lea buorre luonddugáhtten doaibmabidju, muitala Luonddugáhttensearvvi jođiheaddji Truls Gulowsen NTB:i.
Lobihemiid huksejit
Truls Gulowsen mielas galggašedje eiseválddit ja ealáhusat doahttalit Fosen- duomu. Son muitala ahte bihttáid mielde masset sápmelaččat árbevirolaš guovlluid huksenbargguid geažil, ja huksemat čađahuvvojit vaikke boazodoallu, sámi organisašuvnnat ja birasorganisašuvnnat vuosttaldit plánaid.
– Alimusrievtti duopmu lea historjjálaš, go dat dohkkeha álgoálbmogiid rivttiid Norggas ja duomus leat stuora váikkuhusat boahtteáigái. Mii leat dattege beahtahallan go stáhta njozet čuovvola duomu. Fosen-duopmu lea dehálaš láidestus eará dehálaš áššiide mat gusket sámi boazodollui, juoidá maid Norgga eiseválddit fertejit doahttalit, deattuha Gulowsen.
Dá leat stuorámus huksenplánat:
Bieggafápmohuksemat, Jillen-Njaarke orohagas. Øyfjellet Wind lea huksejeaddji, ja doppe huksejuvvo.
Veaikeruvke, Riehpovuonas Hámmerfeasta suohkanis. Nussir ASA lea ožžon konsešuvnna ja huksemat leat plánejuvvon.
Elfápmolinnjá, Skáiddis gitta Davvesiidii. Statnett lea huksejeaddji, leat meannudeamen ohcamuša.
Davvi bieggafápmohuksemat, Rástegáissás. Grenselandet AS lea huksejeaddji, leat meannudeame ohcamuša.
©NTB
