Trygg Trafikk ja Syklistenes Landsforening gáibidit ráđđehusa johtalusbušeahtas bidjat eambbo ruđaid dorvvolaš skuvlageainnuide.
Suohkanat ja gielddat dárbbašit eambbo ruhtajuolludeami, go váhnemat eai duostta luoitit mánáid vácci skuvlii.
Trygg Trafikka direktevra Jan Johansen muitala preassadieđáhusas ahte sii vurdet unnimusat 62 miljovnna suohkaniid ja gielddaid doaibmabijuide.
– Lea stuora dárbu buoridit skuvlageainnuid olu suohkaniin ja gielddain Norggas. Dán jagi leat 157 suohkana ja gieldda ohcan doarjaga 340 iešguđetge doaibmabijuide. Dat čájeha ahte lea stuora dárbu buoridemiide, muhto ráđđehus ii čuovvul, muitala Johansen.
Ráđđehus lea almmuhan doarjjaortnega mas suohkanat ja gielddat sáhttet ohcat doarjaga doaibmabijuide mii galgá buoridit ja sihkkarastit skuvlageainnuid ja lagasguovlluid. Trygg Trafikk ja Syklistenes Landsforening reagerejit dasa go ráđđehus lea dušše juolludan 22 miljovnna ruvnno johtalusbušeahtas.
Sosialisttalaš Gurutbellodat (SG) lea evttohan lasihit bušehttii vel 40 miljovnna ruvnnu. Trygg Trafikk ja Syklistenes Landsforening leat ovttaoaivilis:
– Dál berrejit šiehtadallat boahtte jagáš bušeahta, ja juolludit unnimusat 62 miljovnna ruvnnu doaibmabijuide, nu mo SG lea evttohan, deattuha Johansen.
Váhnemat ballet
Syklistenes Landsforeninga gaskaboddosaš generálačálli, Emil Rensvala, deattuha ahte lea buorre go mánát ja nuorat vázzet dahje sihkkelastet skuvlii.
– Dál lea nu ahte guđas logi oahppis vázzet dahje sihkkelastet skuvlii. Muhto mii eat leat olahan iežamet mihttu, ahte gávccis logi oahppis galget dan dahkat. Dan mihttu leat bidjan dan dihte go lea buorre ahte mánát ja nuorat lihkadit eambbo, ja galgá unnit johtolat skuvlageainnuid alde ja skuvlašiljus, muitala Rensvala.
Rensvala lohká ahte dorvvolaš skuvlageaidnu lea juoidá mii dagaha ahte eambbo váhnemat dustet luoitit mánáid vácci dahje sihkkeliin. Syklistenes Landsforening lea jearran 8 000 sihkkelastiiguin miehtá Norgga mo sin mielas orrot doaibmabijut doaibmamin, ja logut čájehit ahte okta juohke logát váhnen ballá luoitimis mánáid.
Leat dušše 16 proseantta geat dovdet ahte skuvlageaidnu lea dan mađe dorvvolaš ahte dustet luoitit mánáid ieža mannat.
– Mii eat sáhte dohkkehit ahte váhnemat ballet mánáid sihkarvuođas go galget skuvlii beassat. Dan dihte dárbbašit mii ođđa doaibmabijuid, dávjá eai dárbbaš eambbo go doaibmabijut mat doibmet. Mii sávvat ahte ráđđehus čuovvola ja juolludit eambbo ruđaid buoridit skuvlageainnuid, loahpaha Rensvala.
