Áktor gáibidii Finnmárkku dievddu čieža jahkái giddagassii go galgá roavvát veagalváldán máná gii lea vuollel skuvlaagi, ja ráhkadan rohcošangovaid.
Nu bođii ovdan gáibádusas man stáhtaadvokáhtta Torsen Hevnskjel ovdanbuvttii loahppaprosedyras Nuorta-Finnmárkku diggegottis Čáhcesullos.
Aktor čuoččuha ahte leat čielga duođaštusat ahte lea máŋgii rohcošan unnimusat jahkebeali áigodagas.
– Dát ášši adno earenoamáš roavisin go lea máŋgii dáhpáhuvvan, máná agi dihte, go lea earenoamáš loavkašuhtti vuohki ja go earát vel leat leamaš das, dajai stáhtaadvokáhtta.
Áktor lohká dievdu galggašii oažžut gávcci jagi giddagasduomu, muhto unniduvvo go lea oasi dovddastan.
Golbma jagi nissonii
Son lohká dievddu dalá ovttasássi leat searvan veagalváldimii ja ieš maid dahkan seksuála vearredaguid máná vuostá, ja gáibidii golmma jagi giddagasduomu nissonii, mas jahki lea eavttuiguin.
Nisu ii leat dovddastan sivalažžan go čuoččuha ahte son lea bággehallan searvat daguide.
Hevnskjel oaivvilda ahte nisu sáhttá ráŋggáštuvvot, vaikko sus lea geahppasit psyhkalaš doaimmashehttejupmi.
Hevnskjel ákkastalai ahte dagut attáše guhtta jagi giddagasduomu, muhto su diagnosa dihte gáibida ollu oanehit duomu.
Čohkkán jahkebeali
Dát rohcošanáššit fuomášuvvojedje Operasjon Mørketid -akšuvnna bokte, mas politijat duoguštedje ollu govaid ja videoid rohcošeamis ja main ovdanbuktet mánáid seksuálalaš oktavuoađain.
Dát diggi álggii mánnodaga dán vahkkus, ja goappašagat leaba leamaš háldogiddagasas njukčamánu rájes.
Dikkis bođii ovdan ahte dievdu lea ožžon pedofiila diagnosa.
Son lea dovddastan ovtta dain rohcošanáššái sivalažžan main lea áššáskuhtton. Goappašagat leaba njealjátlotjahkásaččat, čállá NTB.
