Diibmá galge biddjot doaimmat sihkkarastit vistti, muhto ovdal go dan gerge de Kárášjoga ovddeš čoakkalmas visti gearggai gahččat čoahkkái.
Diibmá bidje politiijat bátti birra čoakkalmasvistti hehtten dihtii olbmuid mannamis dan láhka.
Odne lea visti gahččan čoahkkái, jáhkkimis ii gierdan boares visti muohttaga mii lei dievvan robi ala. iFinnmark dat ovddemuš dieđihii dán birra.
Galggai gaikkoduvvot, dál áigu vuovdit
Politiijat lohke geasset ahte lea eaiggáda ovddasvástádus váldit vára viesu.
Eaiggát Jan Arne Næss muitalii geasset ahte viessu galgá gurrejuvvot ja gaikojuvvot ovdal go viessosadji biddjo vuovdimassii čakčat.
Dál dattege čájehuvvo ahte ii geargan njeaidit vistti ovdal go dat ieš gahčai, iige Næss áiggo ieš šat maidege dahkat dainna.
Næss muitala Ávvirii ahte tomta ja čoakkalmasvisti oažžu fargga ođđa eaiggáda.
– Ođđa eaiggát de čorge tomta ja čoakkalmasvistebázahusaid, čállá Næss SMS dieđus Ávvirii.
Son ii loga tomtta vuos vuvdon, muhto lea bidjan dan vuovdemassii.
Ii leat leamaš anus
Kárášjoga læstadianismma searvegoddi huksejedje alcceseaset čoakkalmasvistti maŋŋá soađi gos besse ipmilsániid gullat. Čoakkalmasviessu lei anus gitta 70-logu álgui.
Maŋŋel go Kárášjoga ođđa kirku huksejuvvui 1974:is, de vuvde čoakkalmasviesu priváhta olbmuide.
Diibmá geasset čálii Ávvir ahte visttis lea rohpi gáhččamin, ja seainnit bohtanan olggos guvlui.
Geasset go Ávvir finai govvedeamen viesu, de ledje el-rávnnji eret váldimin. Viessu ii leat guhkit áigái leamaš anus.
(Ášši joatká gova vuolábealde)
Vuorkágovva: Josef Isak Utsi
Gaskaboddosaččat sihkkaraste
Geasset lohke politiijat ahte leat ovttasráđiid viessoeaiggádiin sihkkarastán viesu gaskaboddasaš báttiin viesu birra.
Kárášjoga politiijabálvá, Frank Nilsen logai buohkaid vissa leat oaidnán makkár stánddas ovddeš čoakkalmasviessu lea, ja sii ledje bátti bidjan viesu birra nu ahte olbmot eai mana dohko ja vai ii galgga geavvat lihkuhisvuohta.
– Mis lea leamaš gulahallan viessoeaiggádiin, šattaimet ovttaoaivilii ahte bidjat doaimmaid johtui. Rievtti mielde lea eaiggáda ovddasvástádus sihkkarastit viesu, muitala son.
Govven: Berit Marie Lise Eira
