Boazologu unnideami gáibádus álggahuvvui guokte jagi dassái, ja ollugat ealáhusas rahčet boazologuin. Fylkkamánnis sivahit njuolggadusaid.
Finnmárkku Fylkkamánni galggai gozihit boazologu ja guohtuma vai lea buori dásis maŋŋel go ođđa boazodoalloláhka biddjui doibmii, čállá NRK Finnmark.
Ii doaimma buot orohagain seamma ládje
Guokte jagi maŋŋel go fylkkamánni válddii badjelasas boazodoalu hálddašeami, de lea ain beare alla boazolohku, mii lea hálddahusa váldohástalus.
– Mannan geasi ođasmahtte lága, ja nu addui fylkkamánnii vejolašvuohta bisuhit seamma boazologu viđa jahkái. Njuolggadus mii bođii, ii lean áibbas buorre. Muhtin orohagain sáhttit geavahit dan, muhto ii buot orohagain, muitala Finnmárkku Fylkkamánni ossodatdirektevra Trond Aarseth NRK Finnmárkui.
Erenoamážit Guovdageainnus ja muhtin guovlluin Kárášjogas lea ain beare alla boazolohku, dieđiha fylkkamánni.
Ođđa boazodoalloláhka galggai nannet boazodoalu iešmearrideami, muhto fylkkamánni mielas lea leamaš váttis dan čađahit Sis-Finnmárkkus, čállá NRK Finnmárku.