Fylkkamánni lea sádden gulaskuddamii evttohusa suodjalit vuvddiid Trøndelágas. Dás evttoha suodjalit 17 guovllu, stuoridit guhtta luonddureserváhtta ja stuoridit álbmotmeahci. .
Guovllut main lea sáhka, lea eaktodáhtolaš fálaldat priváhta eanaeaiggádiin. Okta oassi lea Statskog SF eana. Allskog ja Norskog leat priváhta eanaeaiggádiid áirasat. Lea oktiibuot 74562 dekára sturrosaš guovlu, 37394 dekára lea vuovdi mii lea 0,22 proseantta fylkka vuovddis. Jagi 31.12.2019 lei 7,4 % Trøndelága vuovdi suodjaluvvon ja dás lea 4,5 proseantta vuovdi maid sáhttá ávkkástallat. Stuorradiggi lea mearridan ahte riikkaviidosaš ulbmil lea suddjet 10 proseantta vuovddis, seammás go árvvus atná vuovdedoalu.
Ulbmil suodjalemiin lea áimmahuššat luonddu máŋggabealatvuođa, suodjalit iešguđetlágan vuvdiid mat čájehit makkár vuovdeguovllut gávdnojit Norggas ja erenoamážit boares vuvddiid. Dát guovllut galget čájehit iešguđetlágan goahccevuvddiid ja dasa gulli eanašlájaid. Gulaskuddanáigi lea 28.06.20.
