Mannan geasi arkeologalaš goaivumat sámi orrunsaji olggobealde Järvsövas lihkostuvve bures. Sámi meavrresgári náhkkebáddi gávdnui, ja nu guhkkin lullin ii leat goassige gávdnon sámi meavrresgárri ovdal.
Mannan geasi arkeologalaš goaivumat sámi orrunsaji olggobealde Järvsövas lihkostuvve bures. Sámi meavrresgári náhkkebáddi gávdnui, ja nu guhkkin lullin ii leat goassige gávdnon sámi meavrresgárri ovdal.
Mannan geasi goaivvui Gävleborga fylkamusea ovttas Gaaltijein bajás ovtta sámi stobu Stenes, njuolga olggobealde Järvsö Hälsinglandas, Ruoŧas, čállá sameradion ja SVT Sápmi sin neahttasiidus.
Das orui sámi bárra Anna ja Nils Andersson loahpageahčen 1700-logus.
Erenomáš biergasa gávdnan
Geasi goaivumiin gávdne elliid dáktebázahusaid. Eanaš sávzzaid ja gáiccaid dávttiid, kriitabiippuid ja bálsedujiid, muhto maŋimuš goaivunbeaivvi gávdne arkeologat juoga erenomáža.
– Mii dovddaimet dakkaviđe ahte lei juoga erenomáš. Mun hirpmástuvven, go in leat goassige oaidnán juoga seammasullasaš go dán, muitala arkeologa Maria Bjørck, gii muitalii goaivumiid birra semináras Västeråsas gaskavahku.
Fylkamusea válddii oktavuođa Inger Zachrissoniin, gii lea okta dain čeahpemus sámi arkeologaid áššedovdi, ja son sáhtii duođaštit ahte lea sámi meavrresgári hearva dahje geavahuvvon vuorbin.
– Hui fiinna erenomáš gávnnus. Hui gelddolaš ja hárves gávnnus. Lea maiddái hui erenomáš hápmi vuorbbis, muitala Zachrisson.
– Dát lea fylkamusea eanemus erenomáš gávnnus dán jagi, ii leat eahpádus dasa, muitala Maria Björck.
Meavrresgárri lobiheapme
Meavrresgárri lei buot deháleamos čuojanas sámi oskkus. Noaidi geavahii meavrresgári vai gievvuma bokte olahii oktavuođa vuoiŋŋalaš máilmmiin, muhto meavrresgári maid geavahedje beaivválaččat earát go noaidi.
Girku oaidnu lei ahte meavrresgárri lei ipmilvašálaš noaidevuohta ja sii dahke dan danin lobiheapmin.
Inger Zachrisson ii oaivvil gal ahte historjá dál ferte čállot ođđasit, muhto son dárkkuha ahte dat gávnnus lea erenomáš dehálaš.
– Dát gievrudahttá ja riggudahttá min gova sápmelaččain Hälsinglandas, loahpaha Inger Zachrisson.
