Dovddus sámi musihkar, Frode Fjellheim, lea boahtte jagi festiválaprofiila Nordlándda Musihkkafeastavahkkus.
Dovddus sámi musihkar, Frode Fjellheim, lea boahtte jagi festiválaprofiila Nordlándda Musihkkafeastavahkkus.
– Lean hui ilus ja rámis go oaččun vejolašvuođa leat festiválaprofiilan Musihkkafeastavahkkus Bådådjos. Lean hui čadnon dán guvlui, ja lean ollu leamaš Bådådjos ovdalaččas. Musihkkafeastavahkku lea buorre báiki munnje iskat ja vásihit musihka ovttas earáiguin, muitala Frode Fjellheim preassadieđáhusas man festivála lea sádden Avisa Nordlandii.
Hutkkálaš ja čeahppi
Su sámi duogáš lea nanus iežas musihkas, ja son lea lávlu ja čuojaha sihke piano, synthesizera ja rumbbuid.
– Frode Fjellheim lea hui hutkkálaš ja čeahpes musihkar ja komponista gean anán hui árvvus. Bådådjos lea 200-jagi ávvudeapmi boahtte jagi, ja dat addá lassi perspektiivva ávvudeapmái go čalmmustahttit sámi musihka ja sámi historjjá festivála bokte, muitala direktevra André Wallann Larsen.
Go lea Transjoik joavkku váldoolmmoš, de lea son ovdanbuktán sámi musihkkakultuvrra olles máilbmái, earret eará oassálastán Montreal Jazz Festiválas, Water festiválas Stockholmas, Rouen-festiválas Frankriikkas ja The Knitting Factory New Yorkas.
Lohpida vuordemeahttun musihka
– Dat mii lea nu buorre Musihkkafeastavahkkus lea ahte lea vejolašvuohta ja sadji ovttasbargat eará gelddolaš musihkkariiguin. Lean maid ožžon vejolašvuođa bovdet musihkkariid geaiguin guhkit áigge lean háliidan ovttasbargat. Dan lean mun dahkan, ja leat ođđa vuordemeahttun musihkkaoasážat dan vahkku, muitala Fjellheim.
Stuora sukseassa
Disney lei bálkáhan Fjellheim ráhkadit rahpanmusihka animašuvdnafilbmii Frost, mas boađusin šattai komposišuvdna «Vuelie» man Cantus koarra ovdanbuvttii. 8 milliuvnna skearru leat dán rádjái vuovdán, 15 milliuvnna singela ja musihkka lea streamejuvvon badjel 2 millijárdda geardde neahtas.
Fjellheim lea riegádan Mussiris, ja lea oahpu váldán Troanddima Musihkkakonservatorias. Dál lea son Davvi-Trøndelága allaskuvlla musihkkaprofessor.
