Masá 65 proseantta Norgga politiijain vástidit ahte sin bálká ii govčča buot goluid orrumii ja birgemuššii. Finnmárkku politiijaguovllus lea buoret dilli, doppe vástida bealli ahte dienas ii leat doarvái buorre goluid ektui.
Mannan geasi sáddii Politiforum jearranskovi 14 000 politiijabargái geat leat miellahttun Politiets Fellesforbundas.
Guorahallamis jerre mo politiijat birgejit ekonomalaččat maŋŋel maŋimuš jagiid haddegoargŋumiid. 2637 politiijabargis vástidii 64,6 proseantta ahte bálká ii leat dan mađe buorre ahte nagoda gokčat buot orrun- ja birgengoluid. 28,8 proseantta dadjá ahte sis lea doarvái dienas gokčat dáid goluid, 6,6 proseantta ii háliidan vástidit gažaldahkii.
Muhtin politiijabargi muitala ahte sus ii leat ráđđi šaddat áhpeheapmin, earát ges muitalit ahte barget dan mađe olu badjeláiggi ahte eai beasa ovttastallat bearrašiin nu olu go háliidit ja soapmásat leat ásahan doaibmabijuid vai birgejit ruđalaččat. Earet eará borret unnit, ostet borramuša mii lea hálbbiduvvon ja eai ge šat bora nu dearvvašlaččat go ovdal, muhtimat vuvdet dávviriid, unnidit bearraša astoáiggedoaimmaid ja earát ges maŋidit dárbbašlaš viessopussema.
Finnmárkkus buoremus dilli
Agder politiijaguovllu bargiin lea heajomus ekonomiija, 75,9 proseantta vástidit ahte sis lea menddo unnán dienas orrun- ja birgengoluid ektui.
Finnmárkkus ges lea buoremus dilli. 42,3 proseantta vástidit ahte sis lea doarvái buorre dienas.
Politiets Fellesforbund muitala Politiforum čállosis ahte bálká lea sin deháleamos ášši ja ahte barget dan nammii ahte politiijaid bálkká lokteše eanet.
