Dál lea golbmalogi jagi áigi go vuosttaš ovttasbargošiehtadus gaskal Finnmárkku fylkkagieldda ja Murmánska oblasta vuolláičállui. Fylkkasátnejođiheaddji Ragnhild Vassvik ja Murmánskka guvernevra Marina Kovtun searvvaiga ávvudeapmái Murmánskkas dán vahkku.
Dasa lassin lea 25 jagi Barentsovttasbargu, nu ahte dát vahkku lea ránnjafylkkaid ovttasbarguvuoiŋŋas dan oasis máilmmis.
Ovttasbargu lea dehálaš
Doppe ávvuduvvui ahte lea 30 jagi áigi go Finnmárkku ja Murmánskka vuosttaš ovttasbargošiehtadus vuolláičállui. Sihke fylkkasátnejođiheaddji Ragnhild Vassvik ja Murmánskka guvernevra, Marina Kovtun, cuoigguiga mearkkašumi mobilitehtas ráji badjel mii lea dehálaš dasa maid lea olahan kultuvrralaš, valáštallama ja olbmot-olbmuid ovttasbarggu ektui.
Barents-sukseassa
Barentsovttasbargu loktejuvvui sukseassan, muhto merkejuvvui ahte dá lea dat áidna internationála ovttasbargoorgána mas ii leat ruhtadanvejolašvuohta. Prošeaktadoarjja Kolarcticas ja Norgga beale Girkonjárgga Barentsčállingoddi leat dehálaččat go lea vejolašvuođas sáhka.
– Dat regionála stivrenorgána Barents Euro Arctic Region ferte boahtteáiggis oažžut eambbo iešheanalašvuođa mearridit makkár ovdáneapmi Barentsovttasbarggus galgá, ja seammás ferte organisašuvdna oažžut sierra bušeahtaid dán bargui. Dát addá stivrenorgánaide stuorát doaibmavejolašvuođa go dál lea, ja veahkeha Barentsregiovnna oažžut leahtu, cealká Finnmárkku fylkkadiggeáirras, Remi Strand preassadieđáhusas.