Ávžži gilisearvvi stivra lea sádden reive Finnmárkkuopmodahkii, Akvaplan Nivai ja Finnmárkku fylkkamánnii ja jearran manin Akvaplan Niva lei ožžon guolástanlobi Vuorašjávrris. Dán jávrri ii leat lohpi fierbmut.
Čakčamánu 12. beaivve fuomášedje Ávžži gilisearvvi miellahtut biilla ja jorri mas ledje guolástanrusttegat ja fierpmit.
Dan sivas go lea fierbmegielddus Vuorašjávrris de galgá gilisearvvi olmmoš váldán oktavuođa biilavuoddjin, čájehuvvui ahte lei Akvaplan Niva mas lei lohpi čađahit geahččalanguolásteame maid leat ožžon Finnmárkku fylkamánnis.
Dáhtto dieđuid boahtte áiggis
Reivves maid Ávžžu gilisearvi lea sádden boahtá ovdan ahte Akvaplan Niva ii galgga leat čájehan duođaštusa, muhto searvi ii eahpit sin rivttiid.
Gilisearvi maid imašta áigodaga goas geahččaleapmi galgá leat čađahuvvon, ja gilisearvi dáhttu boahtteáiggis dieđuid jus sullasaš lobit addojit, nu guhká go sis lea lihttoláigu, čállet sii reivves.
