Dál lea mearriduvvon gos Girkonjárgga mánáidviessu galgá leat. Politiijat leat šiehttan láigohit vistti guovdu gávpoga, oalle lahka politiijaviesu.
Dál lea mearriduvvon gos Girkonjárgga mánáidviessu galgá leat. Politiijat leat šiehttan láigohit vistti guovdu gávpoga, oalle lahka politiijaviesu.
Romssa mánáidviesu doaibmi jođiheaddji Are Evang lea duhtavaš ođđa šiehtadusain. Dr. Wessels gate nummár 10 lea báiki gosa Finnmárkku mánáidviessu galgá ásahuvvot.
Visttis leat čuvges lanjat, mat leat bures heivehuvvon doibmii.
– Orun oaidnime ahte dáppe sáhttit hábmet lanjaid gosa mánáide lea buorre boahtit. Lea maid ovdamunni go lea politiijaid lahka. Lea saddjái, ja sáhttit viiddidit jus dan fal dárbbašit. Dasa lassin lea nu aiddo ođastuvvon ahte eat dárbbaš beare olu divvut ovdal go fárret dohko. Soitet vel fiidnát lanjat go dat mat mis leat Romssas, lohká Evang preassadieđáhusas man Romssa mánáidviessu lea sádden.
Finnmárkku mánáide seamma fálaldat
– Go Girkonjárggas lea mánáidviessu, de šaddá olu mánáide Finnmárkkus oanit mátki mánáidvissui. Dat lea hui buorre, lohká Finnmárkku politiijameašttir Ellen Katrine Hætta. Son lohká ahte ođđa mánáidviessu sihkkarastá Finnmárkku mánáide seamma fálaldaga go mánáide eará sajiin riikkas.
Máŋga ásahusa ovttasbarget
Romssa mánáidviesu bargit galget maiddái bargat Girkonjárgga mánáidviesus. Sii galget ovttas báikkálaš politiijaiguin, mánáidsuodjalusain ja eará veahkkeapparáhtaiguin láhčit buori dili mánáide, vai leat oadjebasat gažadeamis.
Álggos galgá mánáidviessu rabas guokte beaivvi vahkkus, muhto heivehuvvo dan mielde man stuora dárbu lea.
Girkonjárgga mánáidviessu fállá seamma bálvalusaid go eará mánáidviesut riikkas. Dasa lassin galgá sierra fálaldat mii galgá čuovvolit mánáid geat leat vásihan veahkaválddálašvuođa.
