Norgga valáštallanlihttu fállá ovttas Norgga spábbačiekčanlihtuin e-kurssa koronahoddema birra, mas oahpahit movt galgá láhttet šiljus ja das lahkosis vai váldá vuhtii njoammuneastadandoaimmaid buoremus lági mielde.
Dihtomielalašvuođa loktet ja váldit servvodatovddasvástádusa, seammás go njoammuneastadeapmi váldo duođalaččat servviin, lea čilgehus go dakkár hoddenoahpahus lágiduvvo.
Kursa fállojuvvo 54 iešguđet sierralihttui mat leat, ja lea valáštalliide geat leat badjel 13 jagi boarrásat, ja buot váhnemiidda geat ieža servet dahje leat mánát geat hárjehallet, leat mielde gilvvuin dahje valáštallanlágidemiin mielde.
Spábbačiekčan oahpistii
– Norgga spábbačiekčanlihttu almmuhii koronahoddenkurssa miellahtuide suoidnemánus. Lihkostuvai hirbmat bures, ja dat lea duogážin go Norgga valáštallanlihttu árvalii ráhkadit sullasaš doaimma. Dan oktavuođas lea ge ráhkaduvvon oktasaš e-kursa seamma ládje go Norgga spábbačiekčanlihttu lea dahkan. Galgá leat dorvvolaš sáddet mánáid ja nuoraid valáštallamiidda, lohká Norgga valáštallanlihtu váldočálli Karen Kvalevåg.
Kursa lea eanemusat sidjiide geat gusket nubbi nubbái, muhto lea dieđusge ávkkálaš buot valáštalliide, čállá Norgga valáštallanlihttu preassadieđáhusas. Kursa ii leat hárjeheddjiide, jođiheddjiide ja luohttámušolbmuide, muhto deattuhuvvo goit ge ahte lea buorre jus sii maid servet.
– Dát joavku ferte bures dovdat iešguđet sierralihtu koronahoddennjuolggadusaid mii guoská olu viidáset go dat maid dát kursa dahká. Lea iešguđet sierralihtu duohken mearridit galgá go kursa leat bággun buot miellahtuide, makkár rolla ja doaibma galgá geatnegahtton miellahtuide, dadjá Kvalevåg.
