Dál mii fas bovdet álbmoga evttohit gii ánssášivččii guoddit dan namahusa jagi 2023 ovddas.
Dán jagi, nu go ovddit jagiid, de nammadit mii Ávviris ovttas iežamet lohkkiiguin ovtta olbmo «Dán jagáš sápmelažžan».
Son gii nammaduvvo galgá bargan buori sámeservodahkii jagis mii fargga lea vássán. Kandidáhtta galggašii beaggán, ollašuhttan juoidá dahje rahčan ášši dahje fáttá ovddidit dahje soitet leat eará ákkat manne juste du evttohas ánssáša namahusa «Dán jagáš sápmelaš».
Dat sápmelaš soaitá beaggán ollu sámemediain dahje vel viidábut iežas barggu dahje rahčamuša oktavuođas. Beakkálmasvuohta stuorraservodagas ii leat váldoágga evttoheapmái.
– Mii illudit fas bidjat johtui gilvvu. Diibmá oaččuimet ollu buriid evttohasaid ja lei ge hui gelddolaš čuovvut jienasteami gitta lohppii, dadjá Ávvira sadjásaš neahttadoaimmaheaddji Roy Arthur Olsen.
Lohkkit mearridit
Jus dus lea evttohus gii namahusa ánssášivčče 2023 ovddas, de sáddes iežat evttohusa ovdal dán mánu 30. beaivvi oktan oanehis čilgehusain.
Evttohusaid gaskkas vállje Ávvira doaimmahus eanemusat 10 kandidáhta geat besset evttohassan. Dasto lágidit jienasteami avvir.no siiddus.
– Mun sávan mii oažžut ollu buriid evttohasaid ja ahte evttohasat boađáše miehtá sámi. Nu ahte jurdil gii ánssášivččii dán jagi ovddas namahusa ja sáddes midjiide evttohusa ja čilgehusa, ávžžuha Olsen.
Sáddes iežat evttohusa oktan oanehis čilgehusain deike: post@avvir.no
