Evttohuvvon oažžut árvvoštalliidbálkkašumi

Norgga árvvoštalliidsearvvi teáhter, musihkka ja dánsunossodat jahkásaččat juohká árvvoštalliidbálkkašumi dien golmma suorggis.

Juohke bálkkašumi gudnejahttá erenoamáš buori, ealas dáiddalaš buktaga, man riikka árvvoštallit leat nammadan.

Beaivváš Sámi Našunálateáhtera bihttá «Vidas Extremas» leage dál evttohuvvon oažžut dán bálkkašumi.

Dán bihttá ovddas oaččui teáhter Hedda-bálkkašumi gieskat.

Illuda

Sámi Našunálateáhtera teáhterhoavda Rolf Degerlund illudii stuorrát go oaččui ođđasa.

– Stuora rámiin dustet nammadeami, dát mearkkaša hui olu iežamet iešdovdui ja muitala ahte mii buvttadit alla dásset teáhtera, ja ahte mii leat dehálaš oassi sámi ja gaskariikkalaš teáhterbirrasis. Sihke Sámi Našunálateáhter ja min ovttasbuvttadeaddji Vidas Extremas buvttadusas Hætta Productions, duođaid illudit dál. Giitu, cealká Degerlund preassadieđáhusastis.

Árvvoštallidbálkkašupmái teáhterii, musihkkii ja dánsumii 2015-2016 leat evttohuvvon:

Teáhter

Beaivváš Sámi Našunálateáhter «Vidas Extremas» bihtáin

Pia Maria Roll «Nå løper vi» bihtáin ovttasbarggus Teater Ibseniin ja Brageteáhteriin

Laurent Chétouane f «Den Stundesløse» bihtá rešiserema ovddas, Nationaltheatret

Musihkka

Alexander Mørk Eidem «Tryllefløyten» bihtá rešiserema ovddas, Den Norske Opera & Ballett

Ingebjørg Kosmo lávluma ovddas «Anna Karenina» bihtás, Den Norske Opera & Ballett

Vilde Frang Mendelssohns Fiolinkonseartta ovddas ovttasráđiid Berlinfilharmonieniin ja Sir Simon Rattlein.

Dánsun

Sigurd Johan Heide ja Kartellet «Doppler» ovddas.

Nasjonalballetten UNG «Departures, We Are Special, Evening Songs ja Picture Perfect» bihtáid ovddas, Den Norske Opera & Ballett

Hege Haagenrud ja Kate Pendry «The rest is Silenc» ovddas Dansens husas

Bálkkašumit juhkojuvvojit Litteraturhuset olgobáikkis Oslos, čakčamánu 29. beaivvi diibmu 11.00.