Olbmot geat orrot davábeal Værnesa Trøndelagas berrejit oažžut mávssu dan ovddas. Dan evttoha ekonomašeaffa Jan Ludvig Andreassen Eika joavkkus.
– Leat sihkkarit olu Lars Monsen sullásaččat geat várra livčče sáhttit orrut Finnmárkkus. Addet daidda ruđa vai dahket dan, dadjá son Minervai.
– Mii fertet jorgalahttit fokusa eret divrras infrastruktuvrrain- ja batteriijaprošeavttain ja baicce oažžut olbmuid fárret Davvi-Norgii, dadjá Andreassen preassadieđáhusas.
Leat birrasii 650 000 ássi dan golmma Davvi-Norgga fylkkas ja Davvi-Trøndelágas. Jus váldit Romssa, Bådåddjo ja Álttá vel eret de lea lohku birrasii 500 000.
– Mii sáhttit áinnas álgit 20–30 000 ruvnnuin jahkái ja de ain loktet, dassái oažžut dan olmmošlassáneami maid mii háliidit, dadjá šeaffaekonoma Minervai.
Andreassen oaivvilda ahte buohkat geat leat priváhta dahje almmolaš sektoris barggus, berrejit oažžut dán doarjaga.
Jus bealli dan miljovdnabealis geat orrot olggobealde «váldoguovlluid» davvin ožžot doarjaga, ja doarjjasupmi lea 100 000 olbmui, máksá dát evttohus 25 miljárdda ruvnno jahkái.
©NTB
