Eurohpá ráđi áššedovdilávdegoddi almmuhii golggotmánu 21. beaivvi raportta mas ávžžuhit Suoma stáhta nannet sámegielaid sajádaga Suomas máŋggaláhkái.
Eurohpá ráđi áššedovdilávdegodtti raporttas leat čielggadan mo Suopma duohtan dahká guovllulaš- ja unnitlogugielaid guoski eurohpálaš vuođđogirjji (eaŋgasgillii: European Charter for Regional or Minority Languages), čállá Yle Sápmi. Dán raporttas deaddu lei doaibmabijuin, mat Supmii leat ávžžuhuvvon jagi 2018 raporttas. Raporttas giitet Suoma muhtin mearreruđaid lasiheamis, muhto cuiggodit dan, ahte prošeaktaruhtadeami ferte measta jahkásaččat ohcat ođđasit.
Ávžžuhus Sámi Giellagáldu ektui
Raporttas čalmmustahttet prošeavttaid ja doaimmaid, mainna stáhta lea dorjon sámegielaid, nu mo giellabesiid ja gáiddusoahpahusa ovddideami. Buorre ovdamearka lea Sámi Giellagáldu.
– Áššedovdilávdegoddi lea duđavaš go guovddáža doaibma lea sáhttán joatkašuvvat Sámediggái čujuhuvvon fásta lasseruhtademiin, vaikko EU Interreg-prošeakta nogai, celket raporttas.
Lávdegoddi ávžžuha viiddidit Sámi Giellagáldu resursaguovddáža ovttas Norggain ja Ruoŧain. Vaikko muhtin prošeavttaid ruhtadeapmi lea lassánan maŋimuš jagiid, de lea gielladoaimmat eanáš mearreáigásaš prošeavttat. Ruhtaohcan ájiha bargonávccaid. Lávdegoddi ávžžuha eiseválddiid juolludit guhkitáigásaš ruhtadeami, maiddái fásta ruhtadeami lihkostuvvan prošeavttaide nu mo giellabesiide.
Suoma stáhta ferte addit čuovvovaš raportta Guovlolaš- ja unnitlogugielaid eurohpálaš vuođđogirjii áššedovdelávdegoddái maŋimustá 1.3.2023. Raporttas galgá čilget mo Suoma stáhta lea ollašuhttán vuođđogirjji ja makkár doaimmaid dat lea ovddidan áššedovdikomitea ávžžuhusaid mielde.
