Norske kirkeakademiers Brobyggerpris 2019 dahje sámegillii Norgga girkoakademiijaid Šaldehuksenbálkášupmi 2019 addo dán jagi Ella Marie Hætta Isaksenii.
Norgga girkoakademiijat čállet preassadieđáhusas ahte gulahallanolbmuid gaskkas hukse šalddiid.
– Go diehtá gii son lea, ja go lea oaván ja rámis čájehit iežas ámadaju čielgasit go deaivvada earáiguin, lea dehálaš buori gulahallamii.
Nuorra ja oaván
Norgga girkoakademiijat čállet viidáseappot ahte Ella Marie Hætta Isaksen lea nuorra ja oaván gii lea leamaš oidnosis sihke artistan ja birasaktivistan.
– Go vállje čalmmustahttit sámegiela, sámi árbevieruid ja sámi kultuvrra, de son čuoččaha vuostá cielahemiid, soardimiid ja čuđiid jagiid heahppašemiid ja badjelgeahččamiid. Mearkkašahtti láhkai ja ovdagovvan lea son lunddolaččat čalmmustahttán sámiid muitalan vugiid. NRK- Stjernekampen lávlungilvvus njuorasmahtii son buohkaid luđiin, daddjo preassadieđáhusas.
– Lea maid fuomášuvvon birasaktivista
Elle Marie vuittii ge Sámi Grand Prix jagis 2016 iežas čállon lávlagiin «Luoddaearu», ja jagis 2017 vuittii ges unnit álbmogiid lávlungilvvuin Liet International. Dan jagi álggahii son maid joavkku ISÁK, ja mannan čavčča vuittii ge Stjernekampen lávlungilvvu.
– Isaksen lea maid fuomášuvvon birasaktivista Natur og Ungdom birasorganisašuvnna bokte. Dan ge olis lea hui bures lokten ovdan sámi árvvuid, daddjo árvvoštallamis.
Buoridan oktavuođaid ja gulahallamiid
Brobyggerprisen addo ge olbmui dahje searvái gii/mii lea erenoamáš vuogi mielde huksen šalddiid mat buoridit oktavuođaid ja gulahallamiid ieš guđet joavkkuid gaskii servodagas. Dan vuođul lea Norske kirkeakademier mearridan addit Brobyggerprisen 2019 Elle Marie Hætta Isaksenii.
Bálkkašupmi lea dáidda maid Håkon Gullvåg lea ráhkadan ja diploma maid stivrajođiheaddji Kjell Y. Riise geige Ella Mariei bálkkašumi Olavfestdagene doaluid olis Troandimis disdaga, geassemánu 30. beaivvi, Nidarosdomenis.