Golbma davimus fylkka álbmot ii hálit ahte fylkkat galget ovttastuvvot stuorra regiovdnan, čájeha ođđa oaiviliskkus.
Golbma davimus fylkka álbmot ii hálit ahte fylkkat galget ovttastuvvot stuorra regiovdnan, čájeha ođđa oaiviliskkus.
53,1 proseantta jerron olbmuin dán golmma fylkkas, háliidit bisuhit dálá fylkkarájáid, čájeha oaiviliskkus maid InFact lea dahkan Nordlys ja Amedia ovddas.
Finnmárkulaččat leat eanemusat vuostá ovttastumi, doppe vástidedje 61,3 proseantta ahte háliidit bisuhit fylkkaset nu mo dál lea.
Tromssas háliidit 45,5 proseantta joatkit nu mo odne.
Seammás vástidedje 36,6 proseantta tromsalaččain ahte leat mielas ovttastahttit fylkkaid.
– Sávašin ahte eambbosat oainnášedje ávkki čohkket Davvi-Norgga ovtta regiovdnan. Mun jáhkán mii dinešeimmet olu jus ovttastuvvot ja smiehttat stuorát ollislaš perspektiivvas, lohká stáhtačálli Per-Willy Amundsen Gielddalaš- ja ođasmahttindepartemeanttas.
Ráđđehus háliida ovttastuhttit dálá 19 fylkka, nu ahte bázášedje birrasiid logi regiovnna.
Nordlánddas leat 23,3 proseantta vástidan ahte leat mielas ovttastuvvot eará fylkkaiguin, 55,8 proseantta ges háliidit bisuhit dálá dili.
Finnmárkkus leat 21,5 proseantta mielas ovttastuvvot eará fylkkaiguin.
3 040 ássi dán golmma fylkkas leat vástidan oaiviliskosii.
(©NTB)
