Sámi allaskuvlii leat dán jagi ohcan eambbo studeanttat go diibmá, čájehit aiddo almmuhuvvon ohcciidlogut.
Diimmáža ektui leat ohcciidlogut veahá gorgŋon danne go boahtte čavčča álget eambbo oahput, čállá Sámi allaskuvla preassadieđáhusas.
Dássedis logut oahpaheaddjeoahpuin
Oppalaččat leat stabiila ohcciidlogut oahpaheaddjeoahpuide.
– Sámi allaskuvla oaidná dan buorren go oahpaheaddjeoahpuide ohcet dássedit, danin go miehtá Sámi lea ain stuora dárbu sámi oahpaheddjiide sihke mánáidgárddiin ja skuvllain, dadjá rektor Laila Susanne Vars.
Preassadieđáhusas čilgejit ahte oahppoovttadagat, mat leat oanehit áigge oahput, leat bivnnuhepmosat ohcciid gaskkas. Sámi servodat- ja giellafágat geasuhit buot eanemus ohcciid. Sámegielmáhttui lea dárbu servvodagas, sámi suohkanat ja fylkkasuohkanat mat leat sámegiela giellahálddašanguovllu siskkobealde, departemeanttat, stáhtahálddašeaddjit ja sámi ásahusat, media, riektavuogádaga siskkobealde ja boazodoallohálddahus leat bargosajit gos sámegiella dárbbašuvvo.
– Sávan ahte eanebut vállješe ollesáiggi sámegiela bachelor- ja masteroahpu háhkat, muhto oaidnit čielgasit ahte sámegiela ja servodatfágaid oahppoovttadagat dahje oasseáigeoahput dat geasuhit buot eanemus ohcciid.
Joatkka- ja lassioahput bivnnuhat
Vars lohká sin vuohttit maid ahte beroštupmi joatkka- ja lassioahpuide lassána.
– Ovdamearkka dihte oaidnit ahte oahpaheaddjit ohcet oahpuide main besset nannet iežaset gelbbolašvuođa gáiddusoahpahusa čađaheamis ja digitála reaidduid geavaheamis. Korona-áigodagas lea skuvllain leamaš olu gáiddusoahpahus, ja árvideames lea dát váldosivvan dasa go dien ohppui ledje ollu ohccit. Mun gal oainnán ahte gáiddusoahpahusa gelbbolašvuođalokten berre leat bissovaš fálaldahkan allaskuvllas, dadjá Vars.
