Mannan mánu dušše 15 olbmo johtolagas. Dán dieđiha Stáda luoddadoaimmahat, ja dán rádjái leat 67 olbmo duššan johtolagas dán jagi.
Leat njealje eambbo olbmo mat dušše suoidnemánu johtolagas dán jagi go diibmá. Stáda luoddadoaimmahaga direktevra Nils Karbø muitala ahte geasset dáhpáhuvvet ge eanas lihkohisvuođat.
– Mii ávžžuhit buohkaid leahkit eambbo várrogasat johtolagas dál go geassi fargga manna loahpa guvlui, lohká Karbø preassadieđáhusas.
Dán rádjái leat 27 olbmo duššan johtolagas geasset, ja diibmá ges 25:s dán muttos geasis. Oktiibuot dušše 47 olbmo geassemánus, suoidnemánus ja borgemánus diibmá.
Jápminlogut nissoniid gaskkas lassánit
Dábálaččat leat eatnasat mat duššet johtolagas dievddut, muhto nissonlogut leat lassánan dán statistihkas. Dán rádjái leat 19 nissonolbmo duššan johtolagas, ja ná stuora lohku ii leat leamašan 2014 rájes. Diibmá dušše 14 nissonolbmo ođđajagimánus suoidnemánnui.
Dán rádjái leat 48 dievdoolbmo duššan dán jagi, ja diibmá ges ledje 51 dievddu duššan dán mutto jagis.
– Buohkat fertejit váldit ovddasvástádusa min oktasaš sihkarvuhtii johtolagas. Jus buohkat leat áicilat, doalahit leahttomeari, leat čilgosat ja atnit biilaboahkána, de unnot jápminlogut.
Nordlánddas duššan eanemusat
Nordlánddas dušše njealjis mannan mánu, ja lea ge dat fylka mas eanemusat dušše mannan mánu. Oktiibuot leat logis duššan Nordlánddas dán jagi, ja lea dušše Innlandet gos eambbosat, oktanuppelogis, leat dán jagi duššan.
