Čavčča rájes čavgejit joatkkaskuvlaohppiid jávkama. Jus eambbo go logi proseantta lea eret, lea váldonjuolggadussan ahte ii oaččo árvosáni.
Čavčča rájes čavgejit joatkkaskuvlaohppiid jávkama. Jus eambbo go logi proseantta lea eret, lea váldonjuolggadussan ahte ii oaččo árvosáni.
Muhto logi proseanta lea dušše váldonjuolggadussan. Ráđđehus lea ásahan ráidalas-vuogádaga jávkamii, ja jus eambbo go 15 proseantta lea jávkan muhtin fágas duođaštusa haga, de ii galgga oažžut árvosáni dan fágas.
Rektor sáhttá árvvoštallat
Jus jávkan lea 10 ja 15 proseantta gaskka, de sáhttá goitge rektor árvvoštallat addit oahppái árvosáni.
– Ođđa jávkannjuolggadusat váldet dál eambbo vuhtii ahte sáhttet leat máŋga siva ja hui iešguđetlágán ákkat dasa go oahppit eai boađe oahpahusdiimmuide, dadjá máhttoministtar Torbjørn Røe Isaksen (Olgeš), guhte ovdanbuvttii ođđa njuolggadusaid duorastaga.
Dáhtui čavgadit ráji
Isaksen lei dáhtton čavget jávkanmeari logi prosentii, muhto oahppit čájehedje vuostehágu, ii ge Stuoradiggi ge dorjon su árvalusa. Son ii bala goitge ahte dál oažžu garra moaitámušaid go váldonjuolggadussan lea biddjon logi proseanta.
– Dán ortnega leat eanas oahppoorganisašuvnnat dorjon, ja dat lea Oahpahuslihtu modealla mielde maiddái, dadjá son.
Golbma jagi
Lihttu cealká NTB ođasdoaimmahussii sii sávvet bures boahtima ođđa njuolggadusaide.
– Lea buorre go beassat geahččalit ođđa ráji ohppiid jávkamiidda joatkkaskuvllain, maid eanas oahpaheaddjit maid leat sávvan. Dát rádji lea nu go oahpaheaddjit hálidit ja dat lea min mielas jierpmálaš, dadjá guovddášstivralahttu Thom Jambak NTB:i. Dát jávkannjuolggadus galgá vuosttažettiin geahččaluvvot golbma jagi.
(©NTB)
