Dan dieđiha Norgga Filbmainstituhta odne, borgemánu 19. beaivvi.
Oktiibuot leat golbma filmma; «A Happy Day», «Ellos eatnu – La elva leve» ja dokumentára «Fedrelandet» nu gohčoduvvon oanehislisttus ovddastit Norgga Oscar filbmabálkkašumis «Buoremus olgoriikafilbma» suorggis.
Čakčamánu 22. beaivvi čielggaduvvo guđemuš filbma ovddasta Norgga.
Norgga Oscat-lávdegoddi oaivvilda ahte dan golmma filmmas leat buorit vejolašvuođat birget bures «Buoremus olgoriikafilbma» kategoriijas.
Ođas dán jagi lea ahte Oscar-akademiijas lea eaktun ahte filmmaid buvttadeaddjit ieža sáhtet dieđihit iežaset lávdegotti árvvoštallamii. Oktiibuot 13 filmma ledje dieđihuvvon Norgga Oscar-lávdegotti árvvoštallamii.