Ealggat ja ruoiggut jápmet Romssas dan olu muohttaga dihte mii dál lea.
Ealga- ja ruoigomiesit váibet ja jápmet nealgái go eai oaččo doarvái biepmu gassa muohttaga geažil, dieđiha Málatvuomi fuođđolávdegoddi.
Fuođđolávdegotti nubbejođiheaddji Tor Eriksen čilge Nordlys aviisii ahte lea boahtán issoras olu muohta Sis-Romssas maŋemus áiggi, ja sii oidnet ahte eallit rahčet go váibet.
– Dan sivas ávžžuhit mii bivdiid ja eanaeaiggádiid sahet muoraid vai eallit ožžot biepmu. Sii sáhttet sahet muoraid boaldámuššan. Rissit ja oavssit mat báhcet eatnamii, leat juoga maid eallit borret. Mii áicat maid eará smávvaelliid mat leat váibagoahtán, lohka son.
Olu muohta luoddaguorain dagaha ahte ealggat ja ruoiggut sestet energiija ja mannet luottaid ala, mii fas dagaha ahte leat eanet ealggat maid vuddjojit. Fuođđolávdegoddi ii áiggo ávžžuhit lobihis vuodjimiidda, muhto namuha ahte ealggat ja ruoiggut sáhttet čuovvut skuter- ja tráktorluottaid.
– Dat dagahivččii ahte eallit eai mana biilaluottaid ala, ja unnidivččii vuojáhallamiid, lohka Eriksen.
Vihtta jagi dás ovdal jápme 30 ealli go ledje váiban, juoga maid Eriksen lohka galggalii garvit dán jagi.
– Mii fertet leat ovdalis dán háve, lohka son.
(©NTB)
