Láttošluohká ássanguvlui, Kárášjoga márkanis, lea guovttemiesat ealgaáldu bisánan. Odne, duorastaga, lea Kárášjoga fuođđolávdegoddi mearridan beatnagiiguin višahit eret ealggaid jus datte guđđet márkana. GEAHČA VIDEO:
Kárášjoga gieldda ráđđeaddi, Nils Aslak Boine, muitala ahte sii leat dál váldán oktavuođa fuođđolávdegottiin.
– Mii leat bivdán fuođđolávdegotti vuojehit eret ealgga, muhto jus ii guođe báikki, de fertet árvvoštallat njuovvat dan, muitala Boine.
Leat ohcamin ealgga
Son lohká dan dahkat ovdal go šaddá váralažžan dahje vahágin.
– Ii luođuealli dieđe goasse, dadjá Nils Aslak Boine.
Juste dál leat juo fuođđolávdegotti olbmot ohcamin ealggaid.
– Mis lea dál okta olmmoš ohcame ealggaid beatnagiin. Jus ii menestuva odne gavdnjet ealggaid eret, de bidjat eambbo návccaid ihttin, dadjá fuođđolávdegotti jođiheaddji Kristian Guttorm.
Gávdne ealggaid
Váile 11:30 muitala Roy Johnskareng ahte son gávnnai ealggaid Láŧevuovddis, mii lea ássanguovllu meahci bealde.
– Dat ruohtastedje Riidonjárgga guvlui. Dat leat muhtun muddui gavdnjejuvvon eret, go dál eai leat šat guovdu ássanguovllu. Muhto mun heaittán dál guorramis, go lea nu ollu muohta. Dál dieđihan gildii, sii fertejit mearridit maid dahket, lohká Johnskareng.
Son vároha ahte dat sáhttet máhccat ruovttoluotta.
