Bargiidbellodat ii dohkket goarideami go áigot heaittihit ovtta ambulánsagirdi Álttás ja ásahit jetgirdi mii galgá Romssas.
Bargiidbellodat ii dohkket goarideami go áigot heaittihit ovtta ambulánsagirdi Álttás ja ásahit jetgirdi mii galgá Romssas.
Svalbárdda nannema dihte ásahit jetgirdi Romsii, de ii ábut goarideapmin šaddat Finnmárkku álbmogii.
– Ambulánsagirdi Finnmárkkus lea dehálaš vai sihkkarastit dárbbašlaš sihkarvuođa jus fáhkka buohccá. Fylka, mas leat guhkes gaskkat ja ollu heajos dálkkit, de ii boađe dábálaš biilaambulánsa nagodit gokčat gearggusvuođa doarvái. Ambulánsagirdit leat dan dihte dehálaččat, ja leat stuora ávkin go buhcciid fievrredeapmi meara ja luottaid bokte ii mana doarvái jođánit. Girdit, maid geavahit go luottat leat gitta ja lea heajos dálki, cealká Finnmárkku Bargiidbellodat preassadieđáhusas.
Ii leat alternatiivan
– Jetgirdi ii leat alternatiiva Finnmárkku gearggusvuhtii go dakkár girdi dušše sáhttá seaivut Áltái, Girkonjárgii ja Levdnjii. Girdi ii sáhte seaivut Čáhcesullui, Várggáide, Gáŋgaviikii, Báhcavutnii, Bearralváhkái, Honnesváhkái, Hámmárfestii ja Ákŋoluktii. Ii ge leat nu ahte dálá gearggusvuođa sáhttá sirdit eret ja geavahit helikopteriid Romssas, go eai leat doarvái jođánat, eai ge nagot seamma bures girdit go lea heajos dálki, cealká Finnmárkku Bargiidbellodat.
Gáibidit plánaid rievdadit
Finnmárkku Bargiidbellodat ii sáhte dohkkehit ahte stuora oassi fylkka álbmogis galgá heajut bálvalus go lea dárbu beassat jođánit buohccivissui.
– Mii gáibidit ahte Davvi Dearvvašvuohta geahčada ođđasit iežaset plánaid ja bivdit dárbbašlaš veahki guovddáš eiseválddiin geat sáhttet bissehit heaittiheami.
