Romssa ja Finnmárkkus eai raba guovžžabivddu.
Liseansabivdu lea doaibmabidju movt muddet guovžalogu. Birasdirektoráhta Ellen Hambro čállá preassadieđáhusas ahte sii eai raba bivddu Trøndelágas, Nordlánddas, Romssas ja Finnmárkkus. Dain fylkkain lea nállemihttu vuollelis go Stuorradikki lohkomearrádus.
Golbma guovžža
Dán čavčča liseansabivddus lea lohpi báhčit golbma guovžža. Bivdu rahpppo dušše muhtun osiin Innlandet fylkkas. Liseansabivdoáigodat álgá borgemánu 21. beaivvi ja bistá golggotmánu 15. beaivái.
