-Almmuhus-
-Almmuhus-
OĐĐASATEai olle gáibidit vuoigatvuođaid áigemearrái

Eai olle gáibidit vuoigatvuođaid áigemearrái

-

-

Kárášjoga Sámiid Searvi lea bivdán guhkidit vuoigatvuođaid dieđihanáigemeari Kárášjogas.

Norgga Sámiid Riikasearvi lágidii vuoigatvuođačilgenseminára lávvardaga Kárášjogas, gos Finnmárkokommišuvnna miellahttu Ole Henrik Magga čuvgii vuoigatvuođaid dieđihanáiggi njealji guvlui Kárášjogas. Dat suorggahii Kárášjoga Sámiid Searvvi jođiheaddji Egil Utsi guhte dál lea čállán reivve Finnmárkokommišuvdnii mas leat bivdán maŋidit áigemeari juovlamánu 31. beaivái dán jagi.

Kommišuvdna lea dássážii ožžon 47 dieđiheami geain soitet leat vuoigatvuođat guovllus.

 

Manahan áigemeari

Egil Utsi muitala jurdda lea iskat lea go vuođđu cegget oktasaš álbmotgáibádusa Kárášjoga eatnamiidda ja čázádagaide vai gielda ieš beassá hálddašit luondduriggodagaid.

 – Ihttin nohká dieđihanáigemearri, muhto eat fuobmán ovdal go lávvardaga dan, lohká Utsi guhte dál lea bivdán guhkidit áigemeari.

 – Mii eat dieđe lea vuođđu gáibidit oktasaš vuoigatvuođaid, muhto dárbbašat áiggi iskat lea go beroštupmi dasa. Ihtážii gal lea veadjemeahttun dan dahkat, muhto oainnán olbmot leat láddan ja láddamin evttohussii sáddet oktasaš gáibádusa, dadjá son.

 

Sáhttá šaddat boađusin

Egil Utsi lea bovden buot bellodagaid Kárášjogas ságastit fáttá birra, ja nu doaivu ahte Finnmárkokommišuvdna čuovvola sin ávžžuhusa guhkidit áigemearri čiežain mánuin.

 – In sáhte dieđusge sihkkarit lohkat ahte ovddidit oktasaš gáibádusa, muhto boađus sáhttá leat nu jus oažžut áiggi iskat ášši eambbo, lohká Kárášjoga Sámiid Searvi jođiheaddji


II LEAT ÁIGEMEARRI: Finnmárkokommišuvnna jođiheaddji Jon Gauslaa ii loga sis áigemeari, muhto ihtážii leat ávžžuhan olbmuid sáddet gáibádusa.

 

Eai berre vuordit beare guhká

Finnmárkokommišuvnna jođiheaddji Jon Gauslaa muitala sii leat vihtta jagi guorahallan Kárášjoga ja livččii hállo oažžut vuoigatvuođagáibádusaid nu jođánit go vejolaš vai sáhttet meannudit gáibádusaid.

 – Mii leat guorahallamin Kárášjoga dál, ja fertet oažžut gáibádusaid nu leat bidjan áigemeari goas ávžžuhat olbmuid sáddet sisa gáibádusaid. Mii meannudit buot gáibádusaid dássái go raporta sáddejuvvo deaddileapmái. Muhto sávan olbmot eai vuordde beare guhká, berrejit nu jođánit go vejolaš sáddet sisa go goas mii nu geargat guorahallamis guovllu, lohká Jon Gauslaa.

-Almmuhus-