-Almmuhus-
-Almmuhus-
OĐĐASATEai leat áibbas sihkkarat ahte dávda ii fas leavva­goađe

Eai leat áibbas sihkkarat ahte dávda ii fas leavva­goađe

-

-

– Leat dál iskan buot Finnmárkku buohcciviesu bargiid geat barget Hámmárfeasttas, dieđiha buohcceviessu gaskavahkku ja lohket sin dárkilit čuovvut dili dál.

– Mii leat maid čađahan iskosa máŋgga geardde dain ossodagain gos leat covid-19 positiiva pasieanttat ja bargit. Leat moadde ođđa dáhpáhusa leamaš maŋemuš beivviid, eat ge sáhte leat sihkkarat ahte dávda ii fas leavvagoađe ođđasit, lea diehtu maid Finnmárkku buohcciviessu lea juohkán gaskavahkku.

Buohcceviesus dieđihit ahte čuvvot dárkilit dávdda dili ja leat gergosat gieđahallat dili jođánit jus mihkkege rievdá, ja gearggusvuohta lea hui badjin dál, ja barget váldit vuhtii pasieanttaid ja bargiid buoremus lági mielde. Buohcceviessu dieđiha maid ahte sii eai váldde vuos sisa pasieanttaid dál.

Bargit máhccagohtet buohccivissui

Dál leat čađahan iskosiid ovttas Hámmárfeastta suohkaniin ja lea oassin dárkkistanbarggus oaidnit movt njoammun lea mannan. 

Eanaš bargiin nohká errenáigi dán vahkku. Bargit, geain leat olbmot ruovttus geat leat erremis, vurdet boahtimis bargui ovdal go buohkat gerget errenáiggiin.

Hámmárfeastta buohcceviesus leat vuoruhemiid geahčadeame movt galget buoridit njoammuneastadeami vel eanet ovdal go álggahit fas doaibmabijuid. Leat maiddái pláneme movt galget doaimma fas álggahit.

Vuordináigi sáhtu dáfus

Girdisáhttu lea bures doaibman, kapasitehta lea buorre, muhto dan stuora doaimma dihte sáhttá leat veahá vuordináigi. Sáhtuin lea maid dárkilis vuoruheapmi.

Leat máŋga ambulánsagirdi biddjon doibmii maiguin sihkkarastet gearggusvuođa ja sáhttet sáddet buhcciid nuppi báikái.

Gáržžideapmi gussiid ektui

– Mis lea maid čielga gáržžideapmi gussiid dáfus min dikšobáikkiin. Pasieanttaid guossit fertejit ovdagihtii čielggadit gussostallama. Dat guoská maiddái jus buohccis lea veahkki. Dan dilis go dál leat, eat hálit nu galle guossi geat fitnet ossodagain, dieđiha Finnmárkku buohcciviessu preassadieđáhusas.

19 bargis covid-19

Gaskavahkku duođaštuvvo ahte leat 19 bargi geaidda lea covid-19 njommon dán rádjái. 

21 bargi leat ain erremis ruovttus. Sivvan go dat lea ievttá rájes rievdan, lea go leat bargit geain lea bearašlahttu erremis ja fertejit orrut ruovttus dassážii go buohkat gerget errenáiggis ruovttus.

Dál lea ovtta pasieanttas duođaštuvvon covid-19 Hámmárfeastta buohcceviesus.

Gaskavahkku diibmu 17.30 čađaha Finnmárkkubuohcciviessu preassadeaivvadeami maid Ávvir čuovvu.

-Almmuhus-