Báhccavuonas Romssas lea válgameattáhus váidaluvvon suohkanii.
Válgadirektoráhtta duođašta ahte Báhccavuona suohkanis, Romssas, lea boahtán váidda dan birra go Konservativt listtu válgalihput eai lean biddjon jienasteddjiid ovdii válgalanjas Gárgáma válgabáikkis.
Suohkana válgastivra galgá meannudit váidaga. Gárgán lea Nordkjosbotn dárogillii ja lea čoahkkebáiki Báhccavuona suohkanis Romssas.
– Gielda- ja guovlodepartemeanta lea loahpalaš váidinásahus, ja Válgadirektoráhtas ii leat makkárge rolla dán váiddagieđahallamis. Váiddaášši meannudeapmi mearrida makkár váikkuhusat áššis šaddet, čállá direktoráhtta e-poasttas NTB:i.
Válgadirektoráhtas lea leamaš oktavuohta suohkaniin maŋŋel meaddima.
– Mis lea leamaš oktavuohta suohkaniin maŋŋel go oaččuimet dieđuid dán áššis. Leat muittuhan sidjiide ahte sii galget fuolahit ahte jienastanlihput leat olámuttos buot válgalisttuid ovddas mat oassálastet válggain, čállet sii e-poasttas.
Áigu gáibidit ođđa válggaid
Sotnabeaivvi diibmu 18.10 dat fuomášedje dan boasttuvuođa Báhccavuonas, muitala sátnejođiheaddji Gunda Johansen VG aviisii. Dál galgá boasttuvuohta njulgejuvvon ja buot jienastanlihput galget leat sajis. Son lohpida ahte buohkat, geat eai leat gávdnan dan jienastanlihpu, besset ođđasit jienastit, ja de lea válgastivrra duohken lohkko go jietna vai ii.
Konservativ listtu jođiheaddji Báhccavuonas Thorleif Selseng, lohká Nordlys aviisii sii áigot gáibidit ođđa válggaid go almmustuvai ahte sin jienastanlihput váilo.
Golmma suohkanis moiven lihpuiguin
Konservativ listu lea dieđihuvvon váilon vel guovtti eará suohkanis lulde, Kongsberg suohkanis ja Tysnes suohkanis Vestlánddas. Tysnes suohkanis váilo maiddái Liberalistene ja Partiet sentrum válgalihput.
(©NTB)
