Miessemánus ledje eanemus jápmimat johtolatlihkohisvuođain mat leamaš 2016 suoidnemánu rájes.
21 olbmo dušše johtolatlihkohisvuođain miessemánus. 18 olbmo sis ledje dievdoolbmot. Viđas dain ledje fas MC-vuoddjit.
– Lea issoras ovdáneapmi maid vávjit miessemánus. Ovdal dan, ledje cuoŋománus maiddái olu duođalaš lihkohisvuođat ja 13 olbmo dušše. Leat balddihahtti logut, ja mis lea bággu digaštallat maid sáhttit dahkat hehttemis dán negatiiva ovdáneami, dadjá Stáhta luoddadoaimmahaga Trafikksikkerhet ossodatdirektevra, Guro Ranes, preassadieđáhusas.
Eanemus Nordlánddas
Erenoamážit Nordlánddas, Rogalandas, Vikenis ja Vestfold ja Telemarkas leamaš negatiiva čujuhus lihkohisvuođastatistihkas dán jagi. Møre ja Romsdalas fas eai leat dássážii duođaštuvvon jápminlihkohisvuođat.
Nordlánddas dušše 4 olbmo johtolatlihkohisvuođain miessemánus. Dássážii dán jagi leat 7 olbmo duššan. Vikenis fas dušše 3 olbmo miessemánus, dássážii leat oktiibuot dán jagi 8 olbmo duššan.
Romssas ja Finnmárkkus dušše 2 olbmo miessemánus, mat leat dássážii áidna jápmimat johtolatlihkohisvuođain dán jagi.
Oktiibuot olles Norggas leat dássážii dán jagi duššan 46 olbmo johtolatlihkohisvuođain.
Leamaš stuorra njiedjan
Vaikke guovtti maŋimuš mánu leat leamaš surgadis logut, de berošta Guro Ranes joatkit mearrediđolaš johtolatsihkarvuođabargguin man Stáhta luoddadoaimmahat lea jođihan maŋimuš 20 jagi.
– Mii diehtit ahte johtolatsihkarvuođabargu doaibmá bures, go dat čájehuvvo bohtosiin maid leat olahan guhkit áiggi badjel, dadjá Ranes preassadieđáhusas.
Son muitala ahte leat nagodan unnidit logu 2002 rájes, 310 olbmos 80 olbmui.
