Ráđđehus lea mearridan ahte joatkkaskuvllaoahppit, geain lea jávkan eambbo go 10 proseantta čavčča rájes, eai ceavzze fága, ja dasa eai leat Guovdageainnu AUF mielas.
Ráđđehus lea mearridan ahte joatkkaskuvllaoahppit, geain lea jávkan eambbo go 10 proseantta čavčča rájes, eai ceavzze fága, ja dasa eai leat Guovdageainnu AUF mielas.
Guovdageainnu AUF vuosttildit ođđa jávkanráji joatkkaskuvllain mii galgá biddjot johtui boahtte skuvlajagi rájes ja ledje gaskkavahkku čoahkkanan miellačájeheapmái Guovdageainnu márkanbáikái. Searvvi jođiheaddji Ulrika Snowdon lohká dat jávkannjuolggadusat leat vuolggahuvvon ideála máilmmis gos jávkán mii ii sáhte duođaštuvvot lea lobihis jávkan.
– Mii leat vuostá jávkanráji go čuohcá ohppiide geat leat eret skuvllas buozanvuođa geažil ja eai oaččo árvosáni fágas, ja dat dagaha ahte unnánit oahppit čađahit oahpuid. Mii hálidit ahte galgá bisuhuvvot nu movt dál lea, lohká son.
Dagaha buohkaid ovdii
Snowdon čilge ulbmil jávkanrájiin lea eastadit lobihis jávkama skuvllas, ja jurddašuvvon sidjiide geat mieleavttus jávket ja skulkejit skuvlla.
– Oaivvildan ahte dat jávkanrádji ii leat rievttes vuohki joksat sin geat skulkejit ja dasa ferte eará čoavddus. Jávkanrádji čuohcá buot ohppiide. Min mielas ii hehte lobihis jávkama, baicca billista buohkaid ovddas, ja mii oaivvildit dat ođđa jávkannjuolggadusat joatkkaskuvllain duvdet eret ohppiid geat duođas dárbbašit skuvlla fuomášumi.
Ii daddjon manne jávket
Guovdageainnu AUF jođiheaddji lohká Sámi joatkka- ja boazodoalloskuvllas lea ollu jávkan, muhto ii leat daddjon ahte dat lea skulken ja lobihis jávkan.
– Soaitá leahkit ahte oahppit ovdamearka dihte givssiduvvot, ja eai nagot vuolgit skuvlii dan geažil. Ja dan eai oaččo duođaštuvvot lobálaš jávkamin.
Čogget vuolláičállagiid
Miellačájeheamis AUF čokkii vuolláičállagiid nuorain geat leat maid vuostá dan ođđa jávkanráji.
– Mii háliidit oaidnit man ollus dáppe Guovdageainnus leat vuostá dan jávkanráji, ja juste dat vuosttildeapmi lea eahpepolitihkalaš ja ii leat dárbu čuvodit AUF jus lea vuostá ođđa jávkanráji, lohká son.
(Ášši joatkká gova vuolábealde)
Čalmmustahttet searvvi
Guovdageainnu AUF Stivraláhttu Joar Sten Olav Sargon Hætta muitala sii seammás dáinna miellačájehemiin háliidit čalmmustahttet iežaset searvvi.
– Mii leat okta dain Finnmárkku stuorámus nuoraidpolitihkalaš servviin, ja mii geahččalit ovddidit áššiid mat gusket nuoraide dáppe Guovdageainnus, nu movt dat ii fal ođđa jávkanrádji, lohká son.
