61 olbmo Guovdageainnu suohkanis eai leat váldán vuostá boahkuhanfálaldaga maid suohkan lea fállan.
Guovdageainnus lea koronaboahkuheapmi sirdojuvvon dearvvašvuođaguovddážis LES-vissui njoammuneastadeami dihte. Guovdageainnu suohkan lea boahkuhišgoahtán 68- ja 69-jahkásaččaid. Sisagohččun sis geain lea fástadoavttir eará suohkanis lea veahá maŋŋonan, muhto dainna bargojuvvo.
13. vahkku leat biddjon obbalaččat 56 koronaboahkuhandosa ja 14. vahkku leat boahkuhan obbalaččat 96 dosa.
– Guovdageainnu suohkanis leat 61 olbmo geat eai leat váldán vuostá koronaboahkuhanfálaldaga, muhto dás ii leat váikkuhus Guovdageainnu suohkana boahkuhanloguide. Koronaboahkuheapmi lea ain eaktodáhtolaš ja nuvttá, čállá Guovdageainnu suohkan sin dieđáhusas.
Iskan 111 olbmo beassážiid
Guovdageainnu suohkan dieđiha ahte dál orrot hui vuollegis koronaboahkuhanstatistihkkalogut. Sivvan dasa čujuha suohkan leat ahte muhtin logut leat boastut ja go Guovdageainnu suohkan ii leat boahkuhan AstraZeneca-boahkuiguin.
– Leimmet plánen álgit AstraZeneca-boahkuid boahkuheami beaivvi maŋŋel go dát boahkuhansorta bissehuvvui. Guovdageainnu suohkan lea joatkán boahkuheami eará boahkuhansorttaiguin ja dain boahkuhandosaiguin maid leat ožžon, ja joatkit dainna lágiin, dieđiha suohkan.
15. vahkku oažžu Guovdageainnu suohkan 16 koronaboahkuhanláse, mas gártet sullii 96 boahkuhandosa. Suohkan dieđiha ahte ii leat ovttasge duođaštuvvon koronavirus Guovdageainnu suohkanis. Beassážiid váldojedje 111 koronaiskosa ja buot iskkusvástádusat ledje negatiivvat.
