Stáhtaministtar lohká departemeanttaid máhttu sámeáššiid birra hedjonit jus «sámeruđaid» čohkkejit ovtta departemeanta vuollái.
Stáhtaministtar lohká departemeanttaid máhttu sámeáššiid birra hedjonit jus «sámeruđaid» čohkkejit ovtta departemeanta vuollái.
– Lea go dát sávahahtti? Lea go de riska ahte dat departemeanttat geain dál lea sektorovddasvástádus ovdamearkka dihte dearvvašvuođasuorggi, oahpahussuorggis ja nu ain, ja geat galget čuovvolit dáid áššiid, de dovdet unnit ovddasvástádusa sámiid ovddas, jus sámedikkebušeahtta juolluduvvo dušše ovtta departemeantta bokte, dadjá Norgga stáhtaministtar Erna Solberg.
Ballá departemeanttaid máhttu hedjonit
Guovvamánus čálii Ávvir dan birra go Ráđđehus lea miehtan digaštallat čohkket stáhtabušeahta juolludemiid Sámediggái ovtta poastta vuollái. Solberg ballá dán sáhttit dagahit departemeanttaid gelbbolašvuođa ovdii.
– Bušeahtta lea hui dehálaš stivrendokumeanta Ráđđehussii, ja de in leat sihkar lea go čoavddus čohkket visot ovtta departementii, muhto mii áigut gullat maid Sámediggi oaivvilda. Mu vásáhus Ráđđehusbarggus čájeha ahte bušeahttaproseassa lea dehálaš daid iešguđet departemeanttaid máhttu nannemis, jus sirdo dušše ovtta postii de departemeanttaid máhttu sámeáššiid birra hedjona, dadjá Solberg.
Oaidná ovdamuniid
Sámedikkepresideanta Aili Keskitalo gal dáhttu Ráđđehusa liikká árvvoštallat ná dahkat.
– Mii oaidnit muhtin ovdamuniid dás, muhto vuiget maiddái ahte das sáhttet leat heajos bealit mat eai leat vel guorahallon. Mii oažžut buriid signálaid ráđđehusas ahte sii leat mielas árvvoštallat min evttohusa ja de fertet oaidnit mo áššiin manná, dadjá Keskitalo seammás go Solberg nivkkuha su bálddas.
Hástalus ráđđádallat bušeahta birra
Sámedikki bealis leat maid máŋgii háliidan ahte Ráđđehus ráđđádalašii singuin go leat hábmemin stáhtabušeahta. Dán ii sáhte gal Solberg lohpidit dahkkot boahtteáiggis ge.
– Bušeahtta lea dat ášši mii lea eanemus čiegus Ráđđehusas. Danne šaddá dávjá váttis ráđđádallat earáiguin bušeahttaáššiid birra, ii leat dábálaš sáddet bušeahttaáššiid gulaskuddamiidda. Danne šaddá hástalus dán ektui, muhto buori ovttasbargu sámi áššiid ja juolludemiid birra, dan gal sáhtán lohpidit, dadjá Solberg.
