Covid-19 vuohon goazaha dáidda- ja kultursuorggi.
Dáiddadálu «EadnámetMaid» nammasaš deaivvadeapmi galggai čohkket akademia, dáidagiid, jurdagiid ja olbmuid Guovdageidnui ja Mázii 5.-8.11. Otná covid-19 dili geažil leat mearridan unnidit ja digitaliseret osiid EadnámetMaid prográmmas. Eará osiid maŋidit nuppe jahkái.
– Mii váldit ovddasvástádussamet servodaga ektui ja guldalit Guovdageainnu suohkana ávžžuhusaid. Danne leat mearridan ahte dál ii leat rievttes áigi čađahit ná stuora deaivvadeami. Liikká eat hálit vuollánit ja bissehit buot man ovddas leat bargan dán dehálaš fáttá ektui. Mii čuovvut buot njoammuneastadan njuolggadusaid ja gávdnat baicca eará čovdosiid vai sáhttit fállat deaŧalaš fágalaš sisdoalu gehččiide ja dáiddáriidda, dadjá Dáiddadálu beaivválaš jođiheaddji, Dine Fenger Arnannguaq Lynge iežaset preassadieđus.
Streamejuvvo, dulkojuvvo ja nuvttá buohkaide
Gáržžiduvvon prográmma streamejuvvo neahta bokte skábmamánu 5.-6. beivviid. Prográmma dulkojuvvo davvisámegillii ja eŋgelasgillii «Interactio» nammasaš dulkonprográmma bokte, ja dan áppa sáhttá vurket telefuvdnii. Sáhttá maid Dáiddadálu neahttasiiddus čuovvut streama. Neahttaliŋka almmuhuvvo Dáiddadálu Facebook siidui ja neahttasiidui. Streama lea nuvttá gehččiide
Luonddu illasteapmi ja psyhkalaš dearvvašvuohta
EadnámetMaid lea deaivvadeapmi gos dáidda ja ságastallan lea guovddážis. 2019:s, SápmiToo deaivvadeamis, humaimet sohkabealrollaid, veahkaválddálašvuođa ja seksuála illasteami birra. Dán jagi oaidnit dárbbu hupmat veahkaválddálašvuođa ja illasteami birra luonddu vuostá. Dáidagiid ja ságastallamiid bokte háliidit čalmmustahttit movt luondduillasteapmi Sámis ja eará álgoálbmotguovlluin váikkuha olbmuide, eallimii ja dearvvašvuhtii. Prográmmas leat sáhkavuorut, ságastallamat, ja maiddái dáiddalaš ovdanbuktimat, filmmat, ja girjealmmuheapmi.
Viiddis ja bistevaš ovttasbargu
– Sámediggi atná árvvus buriid čovdosiid go galgá lágidit doaluid otná covid-19 dilis, ja rámida Dáiddadálu go guldalit báikkálaš politihkalaš ávžžuhusaid seammás go doalahit dáiddasuorggi ealasin, dadjá Sámedikki presideanta Aili Keskitalo.
Sávvet buori fuomášumi
EadnámetMaid lágiduvvo Dáiddadálu bokte, ovttas Sámedikkiin ja Office for Contemporary Art Norway (OCA)ja lea joatkka OCA guhkitáiggi áŋgiruššamis Mázes, ikonalaš gilli sámepolitihka oktavuođas, ja OCA barggu ásahit internationála dáiddárresideansa álgoálbmotdáiddáriidda.
– OCA atná árvvus ovttasbarggu Dáiddadáluin ja Sámedikkiin, ja rámida Dáiddadálu go gávdnet čovdosiid movt lágidit deaivvademiid dáiddáriidda hásttuheaddji áiggis. OCA váldobargu lea čatnat Norgga ja Sámi máilbmái, ja nuppe guvlui. Min bargu lea maid oažžut máilmmi geahčestit dehálaš, muhto unnán fuomašuvvon osiide Norgga ja Sámi dáiddahistorjjás, vai dat oččoše saji riikkaviidosaš dáiddaárenai. «EadnámetMaid» prošeavttas bargat erenoamážit dan ala ahte ásahit internašunála álgoálbmot dáiddárresideanssa Mázii. Dán barggus leat máŋga oasi, okta dain lea divuhit Sámi Dáiddajoavku/Mázejoavku ateliera, dáiddajoavku geat serve vuosttaš luonddugáhtten- ja álgoálbmot lihkadussii, namalassii Álttá akšuvdnii, ja geat maŋŋel begge go golbma dáiddára sin gaskkas čájehedje dáidageaset beakkán Documenta 14 2017:s, dadjá Office for Contemporary Art Norway direktevra, Katya García-Antón ja joatká:
– Mii sávvat addit sin bargui stuorát fuomášumi álgoálbmot-, davviriikalaš ja internationála dáiddahistorjjás, Máze historjjás ja dáiddalaš bargguide Mázes, ja addit ođđa dáiddár buolvvaide vejolašvuođa čatnasit dán historjái boahtteáigásaš dáiddárresideanssa bokte. OCA almmuhii gieskat ahte sámi dáiddárat Pauliina Feodoroff, Máret Ánne Sara ja Anders Sunna, leat válljejuvvon davviriikalaš paviljongii mii dál šaddá sámi paviljongan go Veneziabiennalen lágiduvvo 59. háve 2022:s. Danne lea dehálaš árvvus atnit daid bálgáid maid Mázejoavku leat vázzán boahttevaš dáiddáriidda, maiddái dán golbmasii, dadjá García-Antón.
