Mánát, geat leat leamaš mánáidgárddis gos olu dievddut leat barggus, leat čeahpibut giella- ja rehkenastingeahččalemiin skuvllas. Dan čájeha ođđa dutkan.
Mánát, geat leat leamaš mánáidgárddis gos olu dievddut leat barggus, leat čeahpibut giella- ja rehkenastingeahččalemiin skuvllas. Dan čájeha ođđa dutkan.
– Áidna mii váikkuha movt mánáiguin manná, lea man olu dievddut leat barggus mánáidgárddis, lohká Nina Drange Stavanger Aftenblad aviisii.
Doibmet eará ládje
Statistihkalaš Guovddášdoaimmahagas dutkit Nina Drange ja Marte Rønning leaba iskan iešguđet beliid mánáidgárddiin mat váikkuhit mánáid vuosttaš jagiid skuvllas.
Dutkit eaba gávnna ákka manne bargiid oahppu, hárjáneapmi, stabilitehta dahje duogáš galggašii váikkuhit mánáid kognitiivva ovdáneapmái.
– Okta čilgehus sáhttá ahte dievddut ovttas doibmet mánáiguin eará ládje go nissonolbmot. Eará čilgehus sáhttá ahte dievddut háliidit bargat mánáidgárddiin gos ovddidit mánáid ovdáneami dainna lágiin maid mii eat nagot mihtidit, lohká Drange sin neahttasiiddus.
Hirpmáhuhttá
Dutkan hirpmáhuhttá mánáidgárdehoavdda Kirsti R. Gundersena.
– Ii leat ávki viežžat liigedievddu ossodahkii, ja jáhkkit dássi buorrána. Lea čielggas ahte oahppu ja stabiila bargit váikkuhit. Jus ii boađe ovdan rehkenastingeahččalemiin go mánát leat gaskkal 6 ja 9 jagi boarrásat, de mearkkaša goit ge olu dasa movt mánáin lea dilli go leat mánáidgárddis, lohká Gundersen Aftenbladet avisii.
Riikadásis leat ovcci proseantta mánáidgárdebargiin dievddut. Iskkadeamis ledje 2161 máná mielde, geat ledje mánáidgárddis 2005-2007 áigodagas.
(©NTB)
