Mánáid borasdávdasearvi almmuha 25 miljovnna ruvnno mánáid ja nuoraid borasdávdda dutkamii.
Mánáid borasdávdasearvi almmuha 25 miljovnna ruvnno mánáid ja nuoraid borasdávdda dutkamii.
– Lea dehálaš olahus Mánáid borasdávdasearvái, mii háliidit leahkit váldoaktevra dán suorggis boahtteáiggis. Dutkan addá ođđa máhtu ja dat fas addá doaivaga min pasieantajovkui. Dutkan lea áddjás ja máŋggadáfot proseassa, ja lea dehálaš ahte mii oažžut daid čeahpimus dutkiid fárrui. Lea buorre fágabirrasii go juolluduvvojit friddja ruđat dutkamii. Mánáid borasdávdda dutkan ii leat vuoruhuvvon Norggas máŋgga jahkái, lohká Trine Nicolaysen Mánáid borasdávddasearvvi preassadieđáhusas. Son lea Mánáid borasdávddasearvvi beaivválaš jođiheaddji.
Stuora addinmokta
Buot dutkanruđat leat ruđat maid Mánáid borasdávdasearvi lea čoaggán. Olbmuin lea stuora addinmokta.
Facebookas álggahuvvui fáhkka ruhtačoaggin árabut dán jagi, ja dan bokte ožžo birrasii 18 miljovnna ruvnno.
Leat maid ovttasbargoguoimmit mat juohke jagi čogget ruđa searvái. Diibmá attii Team Rynkeby sihkkelsearvi 5,7 miljovnna ruvnno, ja dán jagi maid vurdet stuora supmi.
– Áŋgiris ruhtačoaggit ja ovttasbargoguoimmit leat dehálaččat min searvái. Stuorit ja unnit ruhtadeaddjit leat dagahan ahte sáhttit juolludit nu olu ruđa dutkamii, lohká gulahallanráđđeaddi Anja Tronrud.
Eambbo vejolašvuođat mánnáonkologiijas
Mánáid borasdávdasearvi sávvá ahte bohtet olu ohcamušat dutkanruđaide. Ođđa máhttu sáhttá buktit buoret ja heivehuvvon dálkkodanvugiid mat sáhttet buoridit eallinkvalitehta maŋŋil borasdávdadálkkodeami.
