Finnmárkku politiijaguovllu operašuvdnajođiheaddji Gunnar Øvergaard dieđiha ahte stáhta siviila áibmojohtaleami lihkohisvuođakommišuvdna ja politiija rihkusteknihkkarat leat dutkagoahtán lihkohisvuođaguovllu Álttás.
Finnmárkku politiijaguovllu operašuvdnajođiheaddji Gunnar Øvergaard dieđiha Twittera bokte sotnabeaivvi iđđedis ahte Statens havarikommisjon for sivil luftfart (stáhta siviila áibmojohtaleame lihkohisvuođakommišuvdna) ja politiija rihkusteknihkkarat leat dutkagohtán lihkohisvuođaguovllu.
Lea hui ráhpis guovlu ja váttis dohko beassat.
Politiija oažžu veahki Suodjalusas doalvut bargoveaga ja rusttegiid lihkohisvuođa báikái gosa helikopter lea gahčan.
Helikopter bulii garrasit
Finnmárkku politiijaguovllu operašuvdnajođiheaddji Gunnar Øvergaard čilge ahte maŋŋá go helikopter gahčai eatnamii, de bulii dat garrasit.
– Lea vuordimis ahte ádjána mealgat viežžat ja identifiseret duššan olbmuid. Politiija lea bivdán Kripos ID-joavkku veahkehit identifiseret dáid olbmuid. Dát bargu álggahuvvo sotnabeaivvi, lohká Øvergaard preassadieđáhusa bokte.
Ii almmut vuos namaid
– Politiija ii almmut vuos duššan olbmuid namaid, muhto lea vihtta nuorra olbmo, badjelaš 20-jahkásaččat, Álttás eret geat galget leat leamaš mielde helikopteris. Earret dán vihta áltálačča, de lea pilohta dahje helikpotervuoddji ruoŧŧelaš ja politiija lea dieđihan Ruoŧa eiseválddiide, dieđiha Finnmárkku politiijaguovllu operašuvdnajođiheaddji Gunnar Øvergaard sotnabeaivve beaivet.
Politiija dutket lihkohisvuođa gávdnan dihtii mii dáhpáhuvai go helikopter gahčai.
Lassin teknihkalaš iskamiidda, lágiduvvojit maid gažadeamit ja eará taktihkalaš dutkan.
Politiija gažada sihke vihttaniid ja helikopterfitnodaga bargiid.
– Nu mo dilli dál lea, de lea čielggas ahte ádjána čilget dáhpáhusráiddu ja lea menddo árrat geažudit manin son helikopter gahčai, joatká Øvergaard.
Olu heahteveagat oasálaste barggus
Finnmárkku politiijaguovllu operašuvdnajođiheaddji Gunnar Øvergaard muitala ahte heahteetáhtat ožžo dieđu lihkohisvuođa birra lávvardaga veaigin tiibmu 17.05.
Buot vejolaš bargoveagat ja rusttegat biddjojedje gádjunakšuvdnii ja Davvi-Norgga váldogádjunguovddáš jođihii.
Siviilasuodjalus ja eaktodáhtolaš olbmot Rukses Ruossas ja Norske Redningshunder (Norgga gádjunbeatnagat) ohce veahkkálagaid daid láhppon olbmuid.
Politiija bijai politiijameašttir roassobargoveagi doarjjan bargui báikkis.
Gávdne olbmuid ovdal go sevnnjodii
Okta gádjunhelikopter ja guokte siviila helikoptera fuolahedje ahte gadjunveahka ja rusttegat besse jođánit lihkohisvuođabáikái.
Helikopterveahki haga ii livčče gávdnan daid lihkohisvuhtii duššan olbmuid ovdal go sevnnjodii tiibmu 21.00.
Nu čilge Finnmárkku politiijaguovllu operašuvdnajođiheaddji Gunnar Øvergaard.
