Duorastaga, ođđajagimánu 14. beaivvi geige NRK-hoavda Gonagasa ánsomedálja Johannes Kalvemoi. Álggos ii riekta ipmirdan manne sutnje dan addet, muhto dál lohká dohkkehišgoahtán ahte ánssáša dan.
Bálkkašupmi geigejuvvo duorastaga Kárášjogas. Lea NRK-hoavda Thor Gjermund Eriksen gii geige medálja Gonagasa ovddas.
Kalvemo lea bovden mielbargiid ja lagamus fulkkiid doaluide. Lohká áigut gulul váldit ja návddašit ánsobeaivvi.
– Lean vásihan olu beliid dan barggus, muhto áiggun muitit daid buriid beliid dán beaivvi.
Dohkkehišgoahtán
Álggos go Johannes Kalvemo beasai diehtit ahte oažžu Gonagas ánsomedálja, de son eahpidii ánssáša go dan obage. Skábmamánu álggus beasai son dan diehtit, ja boahtte duorastaga geigejuvvo ge medállja sutnje.
– Dál lean dohkkehišgoahtán ahte ánssášan. Álggos eahpidin, muhto lean ožžon nu olu lihkkosávaldagaid ja lean maid jurddašan ahte gal 40 jagis lean geargan dahkat juoga, sihke TV:s ja rádios. Lean dál jurddašišgoahtán ahte seamma mun ánssášan.
Reaŋga ja bálvá.
Lea NRK Sápmi mii lea evttohan medálja addit Kalvemoi. NRK Sámi ovddeš hoavda Nils Johan Heatta lea ge lohkan ahte Kalvemo lea Sámi deháleamos ovddasteaddji. Ieš Kalvemo gal ii oro áibbas ovttaoaivilis, ja vuollegašvuođain vuostá váldá bálkkašumi.
– In dáhto gohčodit iežan eará go reaŋgan ja bálván. Lean bealistan giitevaš go bargobáiki lea evttohan, ja amma hal hoavda gal ii duššiid dihte evttot.
Áddjá oaiveskálžu
Prográmma, man buoremusat lohká báhcán muitui, lea «Ádjá oaiveskálžu», mas čuovui Sunnen Risten-rohki go ozai iežas ádjá oaiveskálžžu, maŋŋil 1852 stuimmiid Guovdageainnus. Dainna filmmain son olahii viidát. Earret eará vuittii Barents Film Festiválas, ja nammaduvvui Gullruten bálkkašupmái.
Boahtteáiggi birra ii loga nu olu jurddašan, muhto áigu joatkit bargat kulturáššiiguin.
Ii gáđa ii sekundda ge
Kalvemo lea 40 jagi bargan journalistan ja lea olu álgoálbmotáššiid ovddidan.
– In gáđa in sekundda ge go álgen doaimmaheaddjin. Lean beassan máilmmi álgoálbmogiid oaidnit, movt sii cevzet, ja movt eai ceavzze.
