Bearjadaga celkui Likšu diggerievttis historjjálaš duopmu gaskal Vapsten čearu ja Vapsten Lappby. Das lea sáhka geas lea boazodoalloriekti Vapstena guovllus, Västerbottenis Ruoŧas.
Ruoŧas galgá leahkit miellahttun čearus ovdal lea riekti boazodollui, bivdui ja guolásteapmái čearu eatnamiin. Skábmamánus 2019 moadde lullisápmelačča Vapsten Lappby namas stevdnejedje Vapsten čearu go sii oaivvildit ahte sis lea maid riekti bargat bohccuiguin, guolástit ja bivdit Vapstena čearu eatnamiin vaikko eai leat čearu miellahtut.
Dakkár duopmu ii leat goassege celkon diggerievttis go riekti boazodollui, guolásteapmái ja bivdui galgá čielggaduvvot.
Seamma riekti
Likšu diggeriekti cealká duomus ahte lullisápmelaččat dehe moadde miellahttu Vapsten Lappbys eai leat ožžon vejolašvuođa leahkit čearu miellahttun. Ja ahte sis lea seamma riekti boazodollui go Vapsten čearu miellahtut. Dan duomus lea vuođđun doloža áigge geavaheapmi.
Likšu diggeriekti galgá iskat movt miellahttonjuolggadusat boazodoalus rihkkot ráđđehushámi.
Naadja Östergren, Vapsten Lappby ovddasteaddji cealká kommentáras SVT Nyheterii ahte sii leat duhtameahttumat go ii lea čielga duopmu.
– Mun in oainne eará čovdosa go váidit dan ášši.
Olles duomu sáhtát lohkat dáppe.
